Нидерландын Эредивизээс энэ улиралд “Витесс” доод лиг рүү унах нь тодорхой боллоо. Тус клубыг ОХУ болон Израилийн тэрбумтан Роман Абрамовичтой холбоотой санхүүгийн зөрчил үйлдсэн хэмээн үзэж, 18 оноо хаслаа. Ингэснээр тус клуб -1 оноотой болж, үлдсэн дөрвөн тойрогт бүтэн 12 оноогоо авлаа ч гэлээ 17 дугаар байрт бичигдэж буй “Волендам”-ыг оноогоор гүйцэх боломжгүй боллоо.
Хөлбөмбөгийн хорхойтнууд “Витесс” клубыг сайн мэдэх байх. Роман Абрамовичийн үед Английн “Челси”-гээс маш олон хөлбөмбөгчийг зээллэгээр авдаг, охин компани шигээ болгосон байсан. Тэгвэл The Guardian хэвлэл болон Эрэн сурвалжлах сэтгүүлчийн нэгдлээс явуулсан мөрдлөгөөр Роман Абрамовичтой шууд хамааралтай нь нотлогджээ.
Хэрэг зөрчлийг мөрдөн шалгах явцад “Витесс”-ийн удирдлага мэдээллээ буруу өгч, зарим баримтыг нууцалж өнгөрүүлэхийг хичээсэн гэнэ. Одоо ч Роман Абрамович энэ клубыг нууцаар удирддаг байж магадгүй гэх хардлага ч бий ажээ. Роман Абрамович нь Их Британи төдийгүй Европын Холбооны улсуудад санхүүгийн үйл ажиллагаа явуулах эрхгүйгээр хориг тавиулсан нэгэн. Тиймээс “Витесс”-ийг энэ хоригийг мөн зөрчсөн гэж буруутгаж ч магадгүй байна. Хэрвээ тэгвэл тус клубыг татан буулгаж магадгүй ажээ.
Роман Абрамовичтой холбоотой өөр нэг клуб нь Английн “Челси”. ОХУ-ын тэрбумтны эзэн байх үед “Челси” санхүүгийн зөрчил гаргасан эсэхийг хянан шалгаж байгаа. Гэхдээ одоогоор шалгалтын дүн гараагүй байгаа тул ямар шийтгэл ногдуулах талаар ярих эрт байна.
Сэтгэгдэл (0)
Сэтгэгдэл бичигдээгүй байна