Өчигдөр Европын Конференц лигийн шөвгийн наймд Английн “Астон Вилла”-гийнхан Францын “Лилль”-ийн талбайд зочилсон. 2:1-ээр талбайн эздийн хожлоор өндөрлөснөөр өмнөх тоглолтын дүнгээр хоёр багийн нийлбэр дүн тэнцсэн тул нэмэлт хоёр үе рүү оруулж, эцэстээ тоглолтын дараах пенальтиар ялагчийг шийдэхэд Английн баг илүү байж чадсан.
Энэ тоглолтод “Астон Вилла”-гийн 31 настай аргентин хаалгач Эмилиано Мартинес 30 дахь минутад нэг шар хуудас хүртсэн байлаа. Дараа нь пенальтийн үеэр хуруугаа амандаа барьж, “Лилль”-ийн хөгжөөн дэмжигчдийг дуугүй байхыг сануулсан, өдсөн үйлдлийнхээ төлөө дахин нэгийг авсан. Гэвч түүнийг талбайгаас хөөгөөгүй. Хөлбөмбөгийн дүрэмд тоглолтын үеэр авсан шар хуудас тоглолтын дараах пенальтид хүчин төгөлдөр үйлчилдэггүй аж. Харин шууд улаан хуудас хүртсэн бол үйлчилдэг. Тиймээс Эмилиано Мартинесийг хөөх үндэслэлгүй байжээ.
“Миний замнал тэр чигээрээ адал явдлаар дүүрэн. Би итгэгч мөн хөдөлмөрч хүн. Өнөөдөр хувьд тавилан л ийм байж. Ийм агшинд багийнхандаа талархах ёстой гэж би боддог.
Өчигдөр бид “Реал Мадрид”-ын тоглолтыг үзэж суухад дасгалжуулагч “Магадгүй маргааш пенальти цохиж мэднэ шүү” гэж хэлсэн юм. Би өнөөдөр тоглолтын 30 дахь минутад шар хуудас авсан. Өрсөлдөгч багийн хаалгач адил үйлдэл хийсэн хэрнээ хуудас аваагүй. Тиймээс энэ шүүгч надаас яг юу хүсээд байгааг ойлгосонгүй.
Пенальтийн үеэр бөмбөг цэг дээрээ байгаагүй болохоор л би бөмбөг зөөдөг хүүгээс бөмбөг авах гэсэн юм. Тэгсэн шар хуудас хүртчихсэн. Үнэндээ энэ дүрмийг нь сайн ойлгохгүй юм” хэмээн Эмилиано Мартинес өгүүлсэн байна.
Сэтгэгдэл (0)
Сэтгэгдэл бичигдээгүй байна