ГУНДОГАН: БИ ХЭНИЙГ Ч ГОМДООХ, БУРУУТГАХ ГЭЭГҮЙ!

Европын Аваргуудын лигийн шөвгийн наймд Испанийн “Барселона” талбайдаа Францын “Парис Сэн Жэрмэйн”-д 1:4-өөр хожигдож, улмаар тэмцээнээс хасагдсан.

Тоглолтын хувь заяаг Рональд Араухогийн Баркола дээр гаргасан алдаа шийдсэн байх магадлалтай. Барколаг бөмбөг туун торгуулийн талбай орох агшинд Араухо эцсийн найдлагын алдаа гаргасан гэж шүүгч үзээд улаан хуудас өргөж, талбайгаас хөөснөөр багаа арвууланг нь үлдээсэн.

Тэгвэл тоглолтын дараагаар Араухог заавал тэгж алдаа хийх шаардлага байсан эсэх талаар Илкай Гундоган байр сууриа илэрхийлсэн юм байна. “Би хувьдаа хаалгачийн эсрэг ганцааранг нь гаргасан нь дээр гэж үзнэ. Гоол алдвал алдана л биз. Тоглолтын эхэнд шахуу нэг нь хөөгдчихөөр алчихаж байгаа юм л даа” хэмээн Гундоган дүгнэжээ.

Гундоган ингэж хэлсэн талаар сэтгүүлч гүйж очоод Араухогоос асуудаг юм байгаа биз дээ. Тэгэхэд хамгаалагч залуу “Хэрвээ шүүгч шүглээ үлээгээгүй бол юу ч бололгүй өнгөрөх байлаа. Харин шүгэл дуугарвал би баларна гэдгээ мэдэж байсан. Их гунигтай байна. Гундоганы үгийн тухайд бол бодлоо өөртөө үлдээе. Надад өөрийн гэсэн зарчим, үнэт зүйл бий. Түүнийгээ хүндлэхийг хүсч байна” хэмээжээ.

Үүний дараагаар Гундоган ч гэсэн Араухогийн алдааны талаар өөрийн бодлоо хэлсэн нь “Хэнийг ч гомдоох буюу буруутгах гээгүй” хэмээн тайлбарласан байна. Хэрвээ шаардлага гарвал хэлсэн үгийнхээ талаар ярилцлага өгөхөд ч Гундоган бэлэн байгаа гэнэ.