Өчигдөр Европын Аваргуудын лигийн шөвгийн наймд Германы “Байерн Мюнхен” талбайдаа Английн “Арсенал”-ыг хүлээн авч, Ёзуа Киммихийн агшнаа мэдэрч, урагш гүйн орж мөргөж оруулсан гоолоор 1:0-ээр хожиж, дараагийн шатанд гарлаа.
Мюнхений клубт “Арсенал”-ын ривал “Тоттенхэм”-д олон жилийн турш тоглосон Харри Кейн байлаа. Кейн бол цагтаа “Арсенал”-ын академид байсан ч тарган, тамирчны бие хаагүй гэсэн үндэслэлээр хасагдсан нэгэн. Тиймээс ч өрсөлдөгчийнхөө талаар өөрийн гэсэн онцгой өнцөгтэй юм.
“Сүүлийн 10 жилийн хугацаанд би “Арсенал”-ын эсрэг улиралд ядаж хоёр удаа тоглосон. Тэр тоглолт бүр миний хувьд чухал үйл явдал, том боломж болдог байлаа. Юуны боломж вэ гэвэл өсвөр насанд минь намайг хассан тул үргэлжийн тэдэнтэй тооцоотой, байнга батлах нотлох зүйлтэй байдаг л даа.
Ер нь би замналынхаа туршид ямар нэгэн зүйлийн хэн нэгэнд батлан харуулах, нотлох ёстой тоглогч шиг байгаа юм. Энэ бодол маань намайг орхихгүй байх гэж бодож байна. Энэ бодол эрмэлзлэл хөлбөмбөгчийн замналаа өндөрлүүлтэл миний тархинд оршсоор л байх болно.
Гэхдээ би “Тэд намайг есхөн настай байхад яаж хаслаа. Маргааш алаад өгөх ёстой шүү” гэж хонзогнон боддоггүй. Одоо би “Байерн”-д байна. Мэдээж, “Арсенал” бидний харилцаа өөр онцгой өнцөгтэй ч гэлээ одоо бол би зөвхөн “Байерн”-д туслахаа л нэн тэргүүнд бодох болно” хэмээн Кейн өгүүлсэн байна.
Харин өчигдөр “Арсенал”-ыг хожсоныхоо дараагаар сэтгэгдлээсээ хуваалцахдаа “Гайхамшигтай хожил. Сайхан хожлоо. Энэ улирал өнөөдрийг хүртэл бидний санаснаар болохгүй байлаа. Гэхдээ өнөөдөр гэртээ тоглоно, өрсөлдөгч бидэнд нэг их сул орон зай өгөхгүй гэдгийг мэдэж гарсан. Фанатуудынхаа нүдний өмнө, өөрийн гэртээ сайн тоглох нь их чухал байлаа. Хожлын гоол оруулсан Киммихт баярлалаа. Мөн хаалгачдаа гоол алдахгүй байхад нь тусалсандаа багаараа баяртай байна. Шөвгийн дөрөвт шалгарна гэдэг муугүй амжилт. Тиймээс энэ агшнаасаа таашаал мэдрэх сайхан байна” хэмээжээ.
Сэтгэгдэл (0)
Сэтгэгдэл бичигдээгүй байна