БЭЛЛИНГЭМ: МИНИЙ ТОГЛОЛТ ГООЛООС ИЛҮҮ

Өнөө шөнө Улаанбаатарын цагаар 03:00-д Английн “Манчестер Сити”-гийн талбайд Испанийн “Реал Мадрид” зочлох болно. Хоёр баг эхний тоглолтдоо 3:3-аар тэнцсэн. Аваргуудын лигийн аваргын алдрыг яг одоогоор хадгалж яваа “Сити”-гийнхэн энэ тэмцээний түүхэнд хамгийн олон удаа түрүүлсэн Мадридын клубтэй тулах нь хөлбөмбөгийн хорхойтнуудын хувьд мөрөөдлийн тоглолт үзсэнтэй ялгаагүй юм.

Мадридын клубт өнгөрсөн зун Жүд Бэллингэм нэгдсэн. Энэ англи залууг “Сити” ч авахаар үнэ хаялцсан ч гэлээ сонголтоо өөрөө хийсэн. Энэ талаар ингэж ярьжээ.

“Би өөр клубүүдтэй яриа хэлэлцээр хийж үзсэн нь. Гэхдээ “Реал Мадрид” санал тавихад клубын зангараг, цар хэмжээ, ирээдүйн төлөвлөгөө, хамт тоглох гайхамшигтай хөлбөмбөгчдийг нь бодохоор шууд л гэрээ хийхийг хүссэн. Анчелотти намайг чадна гэж бодож байгаагаас минь илүү дээр тоглож чадна гэж итгүүлж чаддаг юм.

Сайн дасгалжуулагчийн шинж чанар бол тоглогчоо илүү сайн тоглуулж чадах л юм шүү дээ. Надад эрх чөлөөтэй тоглох боломж өгдөг гайхамшигтай хүн гэж хэлмээр байна”  хэмээн Бэллингэм өгүүлжээ.

Испанийн фанатууд хөлбөмбөгчдийг арьс өнгөөр ялгаварлан доромжлох явдал гаарсан гэж яригддаг. Энэ талаар ямар бодолтой явдгийг нь лавлахад Жүд “Испанийн төр засаг, Хөлбөмбөгийн Холбоо арьс өнгөөр ялгаварлан гадуурхах явдалтай шийдвэртэй тэмцэх хэрэгтэй. Винисиус л гэхэд саяхан доромжлуулсандаа уйлсан шүү дээ. Тоглолтод бэлдэж буй хөлбөмбөгчийн сэтгэлзүйг ийм хэмжээнд хүргэнэ гэдэг аймшигтай. Энэ бол арьс өнгөөр дээрэлхэн, хүчирхийлж буй явдал. Винисиус хэдэн жилийн турш хүнд байдалд байхад туслах ч үгүй юм. Үнэндээ би эхэндээ яг юу болсныг мэдээгүй. Харин дараа нь олж сонсоход үнэхээр таагүй явдал болсон байна лээ.

Виниг хүмүүс өөрөөсөө болдог гэдэг. Гэтэл тэгж тоглоод сурчихсан, тэгж өөрийгөө илэрхийлээд дасчихсан хүн байвал яах юм? Үүнийг би лав шударга шийтгэл гэж хэлэхгүй. Хэрвээ Вини сүүлдээ энэ их үзэн ядалтаас болоод тоглохоо больчихвол муухай биз дээ. Хөлбөмбөгчдөө хамгаалах ёстой” гэжээ.

Жүд Мадридын клубт ирээд Ла лигт 24 тоглолтод гарахдаа 16 гоолтой явна. Гоолын хур буулгаж эхлэхэд нь хөлбөмбөг сонирхогчид эхлээд гайхсан. Харин дараа нь дассан. Гэвч яг одоогоор гоолын цуврал хааяа тасалдах төлөвтэй болчихоод байгаа билээ.

 “Жирона”-тай тоглохдоо гэмтсэн нь миний тоглолтод нөлөөлсөн. Сүүлийн тоглолтуудад байнга гоол оруулахаа больсон ч гэлээ эргээд гоолоо хийж эхлэхийг хичээж явна. Ер нь намайг гоол хийхгүй байна гэж шүүмжлэхэд би дуртай хүлээн авдаг. Намайг илүү өндрөөр үнэлж, сайн тоглохыг хүсч байгаа л гэсэн үг шүү дээ.

Ер нь би гоол оруулахгүй байх чухал юм биш. Хамгийн гол нь бид багаараа хожих ёстой. Миний тоглолт гоолоос илүү байхгүй юу. Тэгээд ч би ийм олон гоол оруулна чинээ огт бодоогүй явсан. Одоо бол гоол хийгээд л баймаар санагдаж байгаа. Тэрнээс анх энд ирэхдээ би яг гоол оруулах үүрэгтэй ирээгүй шүү дээ” хэмээн 20 настай англи залуу өгүүлжээ.