Европын Аваргуудын лигийн шөвгийн наймын хариу тоглолтод Германы “Боруссиа Дортмунд” талбайдаа Испанийн “Атлетико Мадрид”-ыг 4:2-оор хожиж, хоёр тоглолтын нийлбэр дүнгээр 5:4-өөр ялалт байгуулан, шөвгийн дөрөв рүү гарлаа.
Тоглолтын дараагаар хоёр багийн дасгалжуулагч юу ярьсныг сонирхлоо. Мадридын клубын дасгалжуулагч Диего Симеоне ялагдлаа хүлээн зөвшөөрчээ. “Бидний хүссэнээр болоогүй энэ тоглолтын төгсгөлийг хүртэл манай баг хожихоор тэмүүллээ. Өрсөлдөгч тоглолтын эхэнд олдсон эхний боломжоо ашиглаж чадсан. Харин бид эхний боломжоо алдсан. Тоглолтын төгсгөл рүү олдсон боломжуудаа тэд ашиглаж чадлаа. 2:2 болсны дараах тэдний хоёр довтолгоо гоол авчирлаа. Манай залуус өнөөдөр чадах бүхнээ л хийлээ. Өөр юу хэлэх вэ дээ. Бид 2:0-ээс тэнцүүлж чадсан. Хожиход ойртож очсон ч гэлээ тэд биднээс өнөөдөр илүү байлаа. Хожигдсон баг хожсон багтаа баяр хүргэчихдэг байх ёстой. Баяр хүргэе” хэмээн Симеоне өгүүлсэн байна.
Тэгвэл Дортмундын клубын дасгалжуулагч Эдин Терзич “Их баяртай байна, залуусаараа их бахархаж байна. Өнөөдөр манай стадионд үнэхээр гайхамшигтай орчин бүрдүүлж чадсан фанатууддаа баярлалаа. Өнөөдөр бид хоёр гоол алдаж, ялагдаж мэдэхээр байдалд хүрсэн ч гэлээ эцсийн эцэст дараагийн шатанд гарч чадлаа. Миний бодлоор бол бид өнөөдөр илүү байлаа.
“Атлетико” шиг хүчтэй багийг давж гарна гэдэг амаргүй л байдаг шүү дээ. Одоо бид ПСЖ-тэй тулна. Хэсэгтээ эхлээд тоглоход 0:2-оор хожигдсон. Харин дараа нь 1:1-ээр тэнцсэн. Хоёр дахь тоглолтод хожих ч дөхсөн дөө. Ямартай ч энэ удаад бид тэдэнтэй хэсэгт тулснаасаа илүү сайн тоглож чадах болно” хэмээн өгүүлжээ.
Сэтгэгдэл (0)
Сэтгэгдэл бичигдээгүй байна