ЯМАЛИЙГ “ГУДАМЖНЫ ГУЙЛГАЧИН”-ТАЙ ХАРЬЦУУЛСАН ТАЙЛБАРЛАГЧ АЖЛААСАА ХАЛАГДАВ

Аваргуудын лигийн шөвгийн наймын тоглолтууд олон гоолтой, сонирхолтой сайхан болсон. Үүний хажуугаар тайлбарлагч нар ч чадах чинээгээрээ давс хужир нэмж, үзэгчдийг доргиож, өөрсдийгөө харуулах хичээцгээжээ.

“Парис Сэн Жэрмэйн”-“Барселона”-гийн тоглолт 2:3-оор өндөрлөсний дараагаар хоёр багийн хөлбөмбөгч, дасгалжуулагчдаас Movistar телевизийнхэн ярилцлага авах гэсэн ч бүгд татгалзжээ.

Юу болоод гэнэт ийм хачин жигтэй зан гаргаад, ярилцлага өгөхөөс татгалзав гээд учрыг лавлатал тоглолтын өмнө “Барселона”-гийн залуу од Ламин Ямалийн бөмбөг жонглёрдож буйг дэлгэцээр харуулсан юм байна. Тэндээс л хэрэг үүсчээ.

Тайлбарлагчдын нэг нь түүнийг хараад “Бөмбөгтэй яаж харьцаж байгааг нь хараач. Янзтай юм аа” хэмээн уулга алдаж гэнэ. Тэгтэл дэргэд нь суусан Херман Бургос “Хэрвээ өөдтэй тоглохгүй бол тэгээд гэрлийн шонгийн дор очих болно шүү дээ” гэж. Херман Бургос бол цагтаа Аргентины шигшээд тоглож явсан хаалгач. Хожмоо “Атлетико Мадрид”-д тоглож байгаад Диего Симеонегийн туслахаар хэсэг ажилласан юм. Одоо бол тайлбарлагч болчихсон хэл амаа билүүдэн суугаа нь тэр аж. Харин түүний хэлсэн хоёр өгүүлбэр яг юуг илэрхийлнэ вэ гэхээр Испанийн гудамжинд бөмбөг жонглёрдож мөнгө олдог хүмүүс байдгийг хэлсэн хэлж. Тэр хүмүүс ихэвчлэн цагаачдын хүүхдүүд байдаг. Нэг ёсондоо Ямалийг тэрхэн хоёр өгүүлбэрээрээ “Цагаачийн гуйлгачин хүү” гээд бараг хэлчихсэн хэрэг. Тэгэхээр дургүйцэлгүй яахав. Тэр даруй хоёр багийнхан ч дургүйцэж, Movistar-д ярилцлага өгөхгүй шүү гэж тохирчээ.

Ламин Ямаль нь марокко, экваторын гвиней гаралтай. Барселон хотоос 30 километрийн зайд байрлах цагаачдын гэх Рокафонд дүүрэг өссөн. Энэ дүүргийн иргэдийн 50 хувь нь ядуу гэсэн тооцоо ч гарчихсан юм байна. Ийнхүү Бургосын хоёр өгүүлбэр зөвхөн хоёр багийнхныг уурлуулаад зогсохгүй олон нийтийн сүлжээнд уур хилэнгийн түймэр асаачихжээ.

Бургос ч, Movistar ч удалгүй уучлалт гуйсан байна. Гэвч эфирээр нэгэнт хэлчихсэн үгийг буцаан залгиж болсонгүй. Маргааш нь Херман Бургос дахиад албан ёсоор уучлалт гуйсан ч тусыг олсонгүй.

Ингээд эцэстээ Movistar Бургосыг халснаа албан ёсоор зарлалаа. Бургостой ярилцаж суусан тайлбарлагч ч гэсэн хатуу сануулга аваад, ажилдаа арай ядан үлдэж хоцорчээ.