ПОЧЕТТИНО: БИ АЛИАЛАГЧ БИШ

Английн Премьер лигийн “Челси”-“Манчестер Юнайтед”-ын тоглолт 4:3-аар Лондоны багийн хожлоор өндөрлөлөө.

Эхлээд “Челси” хоёр гоол оруулсан ч “Манчестер Юнайтед” хариуд нь гурвыг хийж, 2:3-оор тэргүүлж эхэлсэн. Гэвч шүүгчийн сунгасан минутын төгсгөлд “Челси” дахин хоёр гоол хийснээр хожил авч, фанатуудынхаа цөсийг хөөргөлөө.

Дасгалжуулагч Маурисио Почеттино хожлоо ч гэсэн сэтгэл хөдлөлөө илэрхийлдэггүй хүн. Гэвч өчигдрийн хожилд их хөөрч, баярлаж буйгаа олон нийтэд харуулахаас цэрвэлгүй, баяраа тэмдэглэж байгаа харагдсан. Тэгвэл нэгэн сэтгүүлч түүнээс яагаад өнөөдрийнх шигээ үргэлж ингэж баярлан хөөрч болдоггүйг нь асуухад ийм хариулт хэлжээ.

“Сэтгэл хөдлөлтөө автаж, хөөрнө гэдэг нь талбайн хажууд тэнэг мангар үйлдэл хийхийг хэлэхгүй. Мөн галзуу солиотой юм шиг аашлахыг ч хэлэхгүй. Ер нь би тийм ч хүн биш. Энэ баг, талбай дээр байгаа 11 тоглогч дайчин байж, хожлын төлөө бүхнээ зориулах ёстой. Үүнийгээ гүйж, бөмбөгөө хурдхан буцаан авахаар адгаж, гоол оруулж харуулдаг учиртай.

Ийм л зан чанарыг фанатууд харахыг хүсч байгаа. Харах ч эрхтэй. Харин миний хувьд бол тоглолтын явцад сэтгэл хөдлөлдөө авталгүй, бүгдийг нарийн ажиглаж, маш анхааралтай байх ёстой. Тоглолтын дараагаар бол өнөөдрийнх шиг сэтгэл хөдлөлдөө умбаж болно. Гэхдээ л энэ бол цирк биш, алиалагч шиг байх хэрэггүй.

Манай баг бол Европын хамгийн залууд тооцогдоно. Тиймээс ч би илүү тайван, няхуур байх ёстой болдог. Багийнхандаа хэрэгтэй үг, зааварчилгаа өгөхийн тулд өөрөө тайван байх ёстой. Би алиалагч биш. Би ахлах дасгалжуулагч. Хэн нэгэн алиалагч шиг үйлдэл байнга харахыг хүсдэг бол өөрийн гэснийгээ олоод авахгүй юу даа” хэмээн Почеттино өгүүлсэн байна.

Тэгвэл хожигдсон “Улаан чөтгөрүүд”-ийн дасгалжуулагч Эрик Тэн Хаг мөн тоглолтын дараагаар юу хэлснийг сонирхуулья.

“Тоглолтын эхэнд хувь тоглогчийн алдаанаас болж гоол алдаад, тааруухан эхлүүлсэн. Гэхдээ л хоёр гоолыг нөхөж, хожиж чадна гэсэн итгэл байсан. Тэгж ч байлаа. Гоё гоё гоолууд ч хийлээ. Гэвч шүүгчийн сунгасан минутад тоглолтыг хожилд нь тулгаж чадсангүй.

Чухал үед зөв шийдвэр гаргаж, ажлаа сайн хийх ёстой байдаг. Гэвч бид тэгж чадсангүй. Бид энэ тоглолтод илүү давамгай тоглож, ялангуяа манай жигүүрийн тоглогчид их сайн байлаа. Гарначо, Антони хоёрыг хэлж байна.

Бидэнд хэрэгтэй байгаа зүйл бол агшнаа мэдэрч, зөв шийдвэр гаргах. Тоглолтыг “уншиж” чаддаг байх ёстой. Хэзээ бөмбөгөө “барих” вэ гэдгээ мэддэг байх ёстой. Бөмбөгөө аваад, “бариад”, шилжилт хөдөлгөөнүүдээ цагт нь хийх ёстойгоос биш өнөөдрийнх шиг зүгээр тоглолтоо өгчихөж болохгүй” хэмээн Тэн Хаг өгүүлсэн байна.