Английн “Ливерпүүл”-ийн египет тоглогч Мо Салах лхагва гаригийн өглөө бэлтгэлдээ очихдоо жигтэйхэн гангалчихсан байж. Үнэтэй дэгжин хослол өмсөн бэлтгэлийн бааз руу алхаж орсон түүний талаар “Ливерпүүл”-ийн болон бусад багийн фанатууд зүйл бүрээр таамаглан бичицгээжээ.
Харин үнэн чанартаа Мо Салах яагаад гэнэт бэлтгэлийн өмд цамцнаас татгалзан нүдээ гартал гоёсныг клубын зүгээс ч, хөлбөмбөгч өөрөө ч тайлбарлалгүй өнгөрсөн байна. Тиймээс энэ талаар маш олон таамаглал дэвшүүлцгээх боломжийг нээж өгсөн юм.
“Юрген Клоппыг явна гэдгийг дуулаад дасгалжуулагчийн ажлын ярилцлагад орохоор гоёж дээ” хэмээн нэгэн фанат ёжилсон бол “Яагаад гэнэт бэлтгэл дээр Жэймс Бонд болчихоод ирэв?” гэж өөр нэгэн асуужээ. “Шинэ гэрээнийхээ баярыг хийгээ юу?” гэж бас нэгэн асуусан харагдана. Харин “Ливерпүүл”-ийн нэгэн улаан фанат “Шеффилдийн оршуулганд иржээ” хэмээсэн байна. Өнөө шөнө “Ливерпүүл” талбайдаа “Шеффилд Юнайтед”-ыг хүлээж авахтай холбосон хэрэг.
Та ч гэсэн ердийн бэлтгэлийн хувцаснаасаа яагаад гэнэт татгалзан гангалж ирснийг нь таах гээд үзээрэй.
Мо Салах энэ улиралд “Ливерпүүл”-ийн төлөө 33 тоглолтод гарч, 22 гоолтой явна.
Сэтгэгдэл (0)
Сэтгэгдэл бичигдээгүй байна