“Манчестер Сити”-“Арсенал”-ын тоглолт хэдийгээр гоолгүй өндөрлөсөн ч гэлээ Пеп Гвардиолагийн Жек Грилишт ямар нэгэн зүйлийг тайлбарлах үйлдэл үзэгчдэд багагүй таашаал төрүүлж, ярианы сэдэв боллоо.
Зарим фанат Гвардиолагийн иймэрхүү үйлдлийг камерт зориулсан жүжиглэлт гэж үздэг гэнэ. Камер хараад гар хөлөө түргэн түргэн хөдөлгөж, ямар нэгэн зүйлийг ярьснаар олны анхаарлыг татах гэсэн аргаа барсан арга ч гэж зарим нь гоочилжээ. Тэгвэл яг энэ талаар түүнээс нэгэн сэтгүүлч Гвардиолагаас өөрөөс нь асуухад тун ёжтой хариулт өгсөн байна.
“Би камер хараад л тэгж эхэлдэг байхгүй юу. Энэ багийнхаа хамгийн алдартай нь би шүү дээ. Над руу камер чиглэж л байвал би тайван сайхан унтаж амарч чаддаг. Яагаад гэвэл камерт өртөж, дэлгэцээр гарахдаа асар их таашаал мэдэрдэг юм.
Мөн тоглогчдоо ямар муу тоглодгийг ойлгуулахын тулд талбай дээр зориудаар шүүмжлэхийг хичээдэг. Эрлинг Холанд гурван гоол хийлээ ч гэсэн намайг л хэвлэлүүд магтаж мандуулах ёстой. Тэрнээс хөлбөмбөгчдөд ямар хамаа байхав. Үүний тулд л би камерийг ашигладаг юм.
Тэгэхээр дараачийн удаад та бүхэнд өгөх зөвлөгөө байна. Дараагийн удаад биднийг камертаа битгий тоож тусга, тэгвэл асуудал гарахгүй” хэмээн Пеп Гвардиола өгүүлжээ.
Сэтгэгдэл (0)
Сэтгэгдэл бичигдээгүй байна