ТӨСВИЙН ТОДОТГОЛ ХИЙЖ, 1.4 ИХ НАЯДЫГ ХЭМНЭХ Ч ТЭТГЭВЭР, ТӨРИЙН ҮЙЛЧИЛГЭЭНИЙ АЛБАН ХААГЧДЫН ЦАЛИНГ НЭМНЭ

Төр өөрөө бүсээ чангална, төсвөө 1,4 их наядаар хэмнэнэ гэж Ерөнхий сайд Н.Учрал мэдэгдэв.

Томилолт, сургалт сурталчилгаа, тавилга хогшил, машин техник, зөвлөх үйлчилгээ, тэтгэмж, хурал, форум, баяр ёслол, илүүц тээвэр шатахууны зардал, захиргааны зардлыг бүхлээр нь танана. 

Тухайлбал, урсгал зардлаас 433,4 тэрбум, нийслэлийн үнэт цааснаас 758 тэрбум, хөрөнгийн зардлаас 249,5 тэрбум нийт 1,4 их наяд 38,9 тэрбум төгрөг хэмнэх аж. Яамд зөвхөн төрийн албан хаагчдынхаа цалинг тавиад үйл ажиллагаа явуулна.

Хэмнэсэн зардлаасаа шинэ оныг хүлээж хойшлуулалгүйгээр 11-р сараас төрийн үйлчилгээний албаны цалинг жигд 50 хувиар нэмнэ. Үүнд 166,3 тэрбум төгрөг зарцуулна. Төрийн албан хаагчдын цалинг ялгамжтай тогтоож байгааг өөрчлөх хүрээнд энэ ажлыг хийж байгаа гэв.

Мөн 475 мянган ахмад настандаа суурь буюу баталгаат тэтгэвэр олгоно. Энэ хүрээнд ахмад настны тэтгэврийн хэмжээ багад нь ихийг нэмэх байдлаар 100-300 мянган төгрөгийн суурь тэтгэвэр олгохоор болж байна. Үүнд 196,3 тэрбум төгрөг зарцуулна.

Улаанбуудай, хүнсний ногоо, шатахууны нөөцөө нэмэхэд 150 тэрбум төгрөг зарцуулна.

Эрчим хүчний үнэ нэмэхгүй. Үүнд 107,3 тэрбум төгрөг зарцуулна.

Эрчим хүчний салбарт их засвар, тоног төхөөрөмжийн шинэчлэлд 92.7 тэрбум төгрөг зарцуулна.

Нэг ангид 35-аас дээш хүүхэд суралцуулахгүй байх зорилгоор “Гэрт ойр сургууль” хөтөлбөр хэрэгжүүлэхэд 50 тэрбум төгрөг зарцуулна.

97 мянган багш, ажилтны цалинг бүрэн олгоно. Үүнд 674,5 тэрбум төгрөг зарцуулахаар тооцоолжээ.

Ирэх өвөл гал алдахгүйн тулд цахилгаан станцуудын засвар, шинэчлэл, нөөцийн мах, түлш шатахууны нөөц, цэцэрлэгийн хүүхдийн эрт илрүүлэг зэрэг хэн бүхэнд хэрэгцээ шаардлагатай, хэрэгтэй зүйлдээ зориулна.

Иргэддээ, илүү олон хүнд, эрэлт хэрэгцээ хамгийн өндөр зүйлдээ хэмнэсэн зардал, чөлөөлсөн мөнгөө зарцуулна гэлээ.