ХҮҮХДИЙН ЭРХТЭН ШИЛЖҮҮЛЭН СУУЛГАХ ТУСЛАМЖИЙГ ХӨГЖҮҮЛЖ, ДОНОРЫН ТОГТОЛЦООГ БЭХЖҮҮЛНЭ

Эрхтэн, эд, эс шилжүүлэн суулгах тусламж, үйлчилгээний хүртээмжийг нэмэгдүүлэх, хүүхдэд үзүүлэх нарийн мэргэжлийн тусламжийг дотооддоо хөгжүүлэх, эрхтэн донорын тогтолцоог бэхжүүлэх чиглэлээр цаашид хэрэгжүүлэх арга хэмжээний талаар танилцуулжээ.

Энэ хүрээнд Эрхтэн, эд, эс шилжүүлэн суулгах тухай хуулийн хэрэгжилт, тулгамдаж буй асуудал болон цаашид хэрэгжүүлэх үйл ажиллагааны талаар Эрүүл мэндийн хөгжлийн төвийн дэргэдэх Эрхтэн шилжүүлэн суулгах үйл ажиллагаа зохицуулах газрын дарга Б.Алтантулга танилцуулсан юм.

Танилцуулгын үеэр эрхтэн шилжүүлэн суулгах тусламж, үйлчилгээний хүртээмжийг нэмэгдүүлэхийн зэрэгцээ хүүхдэд үзүүлэх тусламж, үйлчилгээг дотооддоо хөгжүүлэх, эрхтэн донорын үйл ажиллагааны чухал хэсэг болох тархины үхэл тодорхойлох тогтолцоог бэхжүүлэх шаардлагатайг онцоллоо.

Хүүхдэд эрхтэн шилжүүлэн суулгах тусламжийг өргөжүүлнэ

Эх, хүүхдийн эрүүл мэндийн үндэсний төвд хүүхдэд эрхтэн шилжүүлэн суулгах эмчилгээ, тусламж үйлчилгээг цаашид өргөжүүлэхээр ажиллах юм.

Ингэснээр эрхтэн шилжүүлэн суулгах шаардлагатай хүүхдүүдэд эх орондоо нарийн мэргэжлийн оношилгоо, эмчилгээ, хяналт, тусламж үйлчилгээ авах боломжийг нэмэгдүүлэх ач холбогдолтой. Түүнчлэн хүүхдийн эрхтэн шилжүүлэн суулгах тусламж үйлчилгээг хөгжүүлэх нь эмчилгээний хүртээмжийг нэмэгдүүлэхээс гадна энэ чиглэлийн мэргэшсэн хүний нөөц, багийн чадавхыг бэхжүүлэхэд чухал ач холбогдолтой юм.

Тархины үхэл тодорхойлох мэргэжлийн баг байгуулна

Манай улсын үндэсний төвд тархины үхэл тодорхойлох мэргэжлийн баг байгуулах асуудлыг мөн онцоллоо.

Тархины үхлийг эмнэлзүйн болон холбогдох журмын дагуу зөв, нэгдсэн байдлаар тодорхойлох нь эрхтэн донорын үйл ажиллагааг зохион байгуулах, эрхтэн шилжүүлэн суулгах тусламж, үйлчилгээг хөгжүүлэхэд чухал ач холбогдолтой. Иймээс мэргэжлийн багийн бүтэц, үйл ажиллагааг бүрдүүлж, эмнэлгийн мэргэжилтнүүдийн мэдлэг, ур чадварыг нэмэгдүүлэх шаардлагатайг танилцуулгын үеэр онцлов.

Хууль, эрх зүйн мэдлэгийг нэмэгдүүлнэ

Эрхтэн шилжүүлэн суулгах үйл ажиллагаа нь хүний эрх, ёс зүй, эмнэлзүйн өндөр хариуцлага шаарддаг тул холбогдох хууль тогтоомжийг эмч, эмнэлгийн мэргэжилтнүүд үйл ажиллагаандаа чанд мөрдөх шаардлагатай.

Мөн иргэдэд Эрхтэн, эд, эс шилжүүлэн суулгах тухай хууль, эрхтэн донорын талаарх ойлголт, ач холбогдлыг зөв, ойлгомжтой мэдээллээр хүргэж, олон нийтийн мэдлэг, хандлагыг нэмэгдүүлэх соён гэгээрүүлэх үйл ажиллагааг эрчимжүүлэх шаардлагатайг онцоллоо.

Цаашид эрхтэн шилжүүлэн суулгах тусламж, үйлчилгээний чанар, хүртээмжийг сайжруулахын зэрэгцээ хүүхдийн эрхтэн шилжүүлэн суулгах тусламжийг хөгжүүлэх, тархины үхэл тодорхойлох тогтолцоог бэхжүүлэх, эмч, эмнэлгийн мэргэжилтнүүдийн хууль, эрх зүйн мэдлэг, ур чадварыг нэмэгдүүлэх шаардлагатай байгааг танилцуулгын үеэр онцолжээ.