Байгаль орчин, уур амьсгалын өөрчлөлтийн сайд, COP17 Зохион байгуулах Үндэсний хорооны дарга Ц.Сандаг-Очир манай улсад маргааш /2026.08.17/ эхлэх COP17 бага хурлын талаар өөрийн цахим хуудастаа ийнхүү бичжээ.
COP17 ба Монгол… бас дэлхийн түүх.
БОУАӨ-ийн сайдын үүрэгт ажлаа хүлээн аваад, 2026 оны дөрөвдүгээр сарын 4-ний өдөр COP17 хурлын бэлтгэл ажилтай танилцахаар Үндэсний цэцэрлэгт хүрээлэнд ирж байлаа.
Тэр үед энд цэвэр бохир ус, эрчим хүчээс өөр дэд бүтэц тавигдаагүй, нэг ч барилга байгууламжийн ажил эхлээгүй байсан юм.
Харин нэг л зүйл байсан.
Энэ нь хийж бүтээж чадна гэсэн итгэлээр дүүрэн залуус.
Өнөөдөр эргээд харахад, тэр итгэл, тэр урам зориг, тэр залуусын нөр их хөдөлмөрөөр юу бүтээснийг харах бахархалтай байна.
Өдөр шөнөгүй ажилласан олон мянган хүний хүч хөдөлмөр, төр засаг, хувийн хэвшил, олон улсын байгууллага, мэргэжлийн багуудын хамтын ажиллагааны үр дүнд Монгол Улс дэлхийн 190 гаруй орны төлөөлөгчдийг хүлээн авахад бэлэн болжээ.
COP хурлыг зохион байгуулах эрх авна гэдэг зүгээр нэг арга хэмжээ зохион байгуулах тухай асуудал биш.
Энэ бол олон жилийн өмнөөс эхэлсэн дипломат яриа хэлэлцээ, улс орнуудтай хийсэн уулзалт, олон талт хамтын ажиллагаа, итгэлцэл бий болгох ажил, Монгол Улсын байр суурийг таниулах дипломат хүчин чармайлтын үр дүн.
Засгийн газар хоёр жил гаруйн хугацаанд энэ эрхийг бодит ажил болгохын төлөө тууштай ажиллаж, хэлэлцээ хийж, олон улсын дэмжлэгийг бий болгож, Монгол Улс дэлхийн өмнө томоохон үүрэг хариуцлага хүлээж чадна гэдгийг харуулсан.
Тэгээд тэр өдөр ирлээ.
2026 оны наймдугаар сарын 17.
Монгол Улс дэлхийн анхаарлын төвд орж, цөлжилт, газрын доройтол, ган, усны хомсдол, уур амьсгалын өөрчлөлтийн эсрэг дэлхий нийтээрээ нэгдэн хэлэлцэх түүхэн мөч эхэлнэ.
Өнөөдрийн байдлаар 12 мянга гаруй хүн Цэнхэр бүсэд оролцохоор бүртгүүлээд байна.
Харин Монгол Улсын иргэд бүртгэл шаардахгүйгээр Ногоон бүсийн арга хэмжээнийг үзэж сонирхох боломжтой.
Иймээс COP17 хурлыг зорин ирэх, оролцох хүмүүсийн тоо 50 мянгаас давж болзошгүй байна.
Энэ бол зүгээр нэг тоо биш.
Энэ бол хүн төрөлхтөн эх дэлхийнхээ хувь заяанд улам бүр анхаарч буйн илэрхийлэл.
Цөлжилт зөвхөн нэг улсын асуудал биш.
Ган зөвхөн нэг тивийн асуудал биш.
Уур амьсгалын өөрчлөлт зөвхөн өнөөдрийн асуудал биш.
Энэ бол бид бүгдийн асуудал.
Бидний хүүхдүүдийн ирээдүй.
Хүн төрөлхтөний нийтлэг хувь заяа.
Монголчууд бид “Эвтэй байвал хүчтэй” гэж хэлдэг.
Өнөөдөр энэ үгийн утгыг дэлхий нийтэд харуулах цаг иржээ.
Бидний эв нэгдэл, бидний хамтын зүтгэл, бидний эх дэлхийгээ гэсэн сэтгэл нэг дор нийлж чадвал Монгол Улс зөвхөн COP17 хурлыг зохион байгуулаад зогсохгүй, эх дэлхийгээ сэргээх дэлхийн хөдөлгөөнд өөрийн мөрөө үлдээж чадна.
Эх байгалиа сэргээж
Итгэл найдвараа бадраая.
COP17-д нэгдэцгээе.
Та бүхнийг хүндэтгэсэн:
БОУАӨ-ийн сайд
Цөлжилттэй тэмцэх тухай НҮБ-ын конвенцын Талуудын 17-р бага хурлыг зохион байгуулах Үндэсний хорооны дарга
Ц.САНДАГ-ОЧИР
Сэтгэгдэл (0)
Сэтгэгдэл бичигдээгүй байна