Цагдаагийн байгууллага үүсэж хөгжсөний 105, Дотоодын цэргийн байгууллагын 104 жилийн ойн ёслолын жагсаал Төв цэнгэлдэх хүрээлэнд өчигдөр /2026.07.18/ боллоо.
Ёслолын жагсаалд Цагдаа, Дотоодын цэргийн 34 анги байгууллагын 1984 алба хаагч, 48 автомашин, 46 морьт бүрэлдэхүүн, 46 албаны нохой оролцов.
Хууль зүй, дотоод хэргийн сайд С.Амарсайхан Ёслолын жагсаалд оролцсон нийт бие бүрэлдэхүүнд баяр хүргэж, мэндчилгээ дэвшүүллээ.
Тэрээр хэлсэн үгэндээ “Өнөөдөр төрийн далбаан дор мөр зэрэгцэн жагссан энэ торгон агшин бол зөвхөн баярын ёслол биш, Монгол төрийн сүр хүч, хууль ёсны баталгаа болсон цагдаа, дотоодын цэргийн байгууллагын нэгэн зууны түүх, үе үеийн алба хаагчдын өргөсөн тангараг, бүтээсэн гавьяа, үнэнч зүтгэлийн үргэлжлэл юм.
Цагдаа, Дотоодын цэргийн алба хаагчид аюул нүүрлэхэд хамгийн түрүүнд очиж, эрсдэл арилсны дараа хамгийн сүүлд буцдаг хүнд албыг нэр төртэй хашиж ирсэн. Баярын өдөр, амралтын цаг, шөнө дөл ялгалгүй эх орон, ард түмнийхээ аюулгүй байдлын төлөө өргөсөн тангарагтаа үнэнчээр зүтгэж ирсэн Та бүхний хөдөлмөр, тэсвэр хатуужил, эр зоригийг Монгол төр өндрөөр үнэлдэг.
Энэ их үүрэг, хариуцлага, хатуу тангаргийн ард алба хаагч бүрийг дэмжиж, хүлээж, түшиж байдаг Цагдаа, дотоодын цэргийн алба хаагчдын бат бөх түшиг, болсон гэр бүлд нь талархал илэрхийлье.” гэв.
Мөн тэрээр Монгол Улсын Засгийн газар, Хууль зүй, дотоод хэргийн яамнаас алба хаагчдын нийгмийн баталгааг бэхжүүлэх, орон сууцны хөтөлбөр хэрэгжүүлэх, хүний нөөцийн чадавхыг нэмэгдүүлэх, хиймэл оюун, дэвшилтэт техник, технологи, камержуулалтын нэгдсэн тогтолцоонд тулгуурласан шинэ үеийн хууль сахиулах байгууллагын цогцлоог бэхжүүлэхэд онцгой анхаарч байгааг дурдлаа.
Ёслолын жагсаалд Цагдаа, Дотоодын цэргийн байгууллагын удирдлагууд, бие бүрэлдэхүүний ар гэрийн төлөөлөл, иргэд оролцжээ.
Сэтгэгдэл (0)
Сэтгэгдэл бичигдээгүй байна