ХУУЛЬ ЗҮЙ, ДОТООД ХЭРГИЙН САЙД ХАРЬЯ АГЕНТЛАГИЙН УДИРДЛАГУУДАД ТОДОРХОЙ ҮҮРЭГ ӨГЧЭЭ

Хууль зүй, дотоод хэргийн сайдын шуурхай хуралдаан өнөөдөр /2026.07.06/ болж, харьяа агентлаг, байгууллагуудын удирдлагууд, ХЗДХЯ-ны газрын дарга нар оролцлоо. 

Хуралдааны эхэнд 2026 оны зургаадугаар сарын 8-ны өдрийн Хууль зүй, дотоод хэргийн сайдын шуурхай хуралдаанаас өгсөн үүрэг даалгаврын биелэлтийг танилцуулсан бөгөөд 83.4 хувьтай байгааг ХЗДХЯ-ны Хяналт шалгалт, дотоод аудитын газраас мэдээлэв.

Улсын хэмжээнд 14 хоногийн хугацаанд бүртгэгдсэн гэмт хэрэг зөрчлийн талаар Цагдаа, дотоодын цэргийн байгууллагаас танилцууллаа. 14 хоногийн хугацаанд 9400 гаруй гомдол мэдээлэл, 3061 гэмт хэрэг, 374, 528 зөрчил бүртгэгдсэн байна.

Бүртгэгдсэн гэмт хэрэг зөрчлийн 96.9 хувь нь зам тээврийн осол байгааг ЦЕГ-ын дарга, дотоодын цэргийн командлагч, хошууч генерал Ж.Болд танилцууллаа.

ШШГЕГ, Хөдөлмөр, халамжийн үйлчилгээний ерөнхий газар НҮБ-ын Хөгжлийн хөтөлбөр (UNDP)-ийн хүрээнд хорих ял эдэлж буй, суллагдах гэж буй болон суллагдсан иргэдийн хөдөлмөр эрхлэлтийг дэмжих, ажилд зуучлах, нийгэмд дасан зохицох чадварыг нь нэмэгдүүлэх чиглэлээр хамтын ажиллагааг эхлүүлснийг онцлов.

Хүүхдийн зуслангуудад гэмт хэрэг зөрчлөөс урьдчилан сэргийлэх модулыг боловсруулан хэрэгжүүлж байна. Тодруулбал ДХИС-ын багш, оюутнууд хүүхдийн зуслангуудад ажиллаж, гэмт хэрэг зөрчлөөс урьдчилан сэргийлэх, соён гэгээрүүлэх, эрх зүйн мэдээлэл олгож эхэлжээ.

Хууль зүй, дотоод хэргийн сайд С.Амарсайхан салбарын агентлаг байгууллагуудын удирдлагуудад;

• Хүүхдийн төлөө үндэсний зөвлөл болон Хүүхдийн төлөө дэд зөвлөлийн 2026 оны үйл ажиллагааны төлөвлөгөөний хэрэгжилтэд онцгой анхаарч ажиллах
• Сайдын шуурхай хуралдаанаас өгсөн үүрэг даалгаврын хэрэгжилтийн тайланг гаргаж ирүүлэхдээ үр дүнд суурилан тайлагнаж байх
• Нийслэлийн 9 дүүргийн иргэдтэй уулзаж өргөдөл, гомдлыг шийдвэрлэх аяныг 7 дугаар сард багтааж зохион байгуулах,
• Төв, Сэлэнгэ зэрэг аймгуудын нутаг дэвсгэрт Хууль бус ашигт малтмал олборлох, хариуцлагагүй уул уурхайн хууль бус үйл ажиллагааны улмаас иргэдийн Үндсэн хуулиар олгогдсон Эрүүл аюулгүй орчинд амьдрах, чөлөөтэй зорчих эрх зөрчигдөж байна. Иймд тухайн газруудад очиж хуулийн дагуу шалгаж, дүнг холбогдох саналын хамт танилцуулах
• Үндэсний их баяр наадам болон COP17 олон улсын хурлын үеэр байгууллага бүр хариуцлага, бэлэн байдлаа сайжруулж, иргэдийн аюулгүй байдлыг хангахад онцгой анхаарч ажиллах
• Фитнесээр хичээллэдэг тамирчдын хэрэглэдэг уураг болон бусад хүнсний нэмэлт бүтээгдэхүүнд допингийн хориотой бодис агуулагдах эрсдэлтэй тул допингийн эсрэг хяналт, урьдчилан сэргийлэх үйл ажиллагааг эрчимжүүлж, энэ асуудалд онцгой анхаарч ажиллахыг холбогдох агентлаг, байгууллагын удирдлагуудад үүрэг болголоо.