Хууль зүй, дотоод хэргийн сайд С.Амарсайхан Улсын бүртгэлийн ерөнхий газарт өчигдөр /2026.05.29/ажиллаж, ажилтан албан хаагчидтай уулзлаа.
Уулзалтын эхэнд Улсын бүртгэлийн ерөнхий газрын дарга Д.Давааням байгууллагын үйл ажиллагаа болон тулгамдаж буй асуудлуудын талаар танилцуулав.
Төрөөс иргэн, хуулийн этгээдэд үзүүлж байгаа нийт төрийн үйлчилгээний 40 гаруй хувийг Улсын бүртгэлийн байгууллага дангаараа үзүүлдэг бөгөөд 2026 оны эхний 4 сарын байдлаар 249,885 эд хөрөнгийн эрхийн улсын бүртгэлийн 176,062, хуулийн этгээдийн улсын бүртгэлийн 261,891 үйлчилгээг тус тус үзүүлсэн байна.
Зарим аймаг, сум, дүүргийн Улсын бүртгэлийн хэлтсүүд зориулалтын бус байранд үйл ажиллагаа явуулж байгаагаас үүдэн Улсын бүртгэлийн архивын хадгалалт хамгаалалтын стандарт зөрчигдөж, эрсдэлтэй нөхцөлд ажиллаж байгааг УБЕГ-ын дарга Д.Давааням танилцууллаа. Иймд Улсын бүртгэлийн үйл ажиллагаа явуулах стандартын шаардлага хангасан гурван давхар барилгын ажлыг эхлүүлсэн бөгөөд Хууль зүй, дотоод хэргийн сайдыг дэмжлэг үзүүлж ажиллахыг хүслээ.
С.Амарсайхан сайд Монгол Улсын Засгийн газраас Иргэн төвтэй төрийн үйлчилгээг хэрэгжүүлэх бодлого баримталж байгааг танилцуулаад төр өөрт байгаа мэдээллийг иргэнээс дахин нэхдэг байдлыг бүрэн халах ёстойг онцлов. Цаашид төрсний гэрчилгээ, гэрлэсний гэрчилгээ, нас барсны гэрчилгээ, газрын болон үл хөдлөх хөрөнгийн гэрчилгээг 100 хувь цахим болгох ажлыг Улсын бүртгэлийн багц хуулийн нэмэлт, өөрчлөлтөд тусган яаралтай горимоор батлуулахаар ажиллаж байна гэсэн юм.
Сүүлийн жилүүдэд үл хөдлөх хөрөнгө, орон сууцтай холбоотой залилан, давхар худалдаа, барьцааны зөрчилтэй холбоотой иргэдийн хохирол эрс нэмэгдсэн. Иргэдийг өмч хөрөнгөөр нь хохироодог эрх зүйн цоорхой, бүртгэлийн сул зохицуулалтыг яаралтай цэгцлэх шаардлага үүсээд байгааг дурдаж энэ чиглэлээр холбогдох журам, зохицуулалтын өөрчлөлтийн саналыг яаралтай боловсруулж танилцуулахыг УБЕГ-ын удирдлагуудад үүрэг болголоо.
Тэрээр улсын бүртгэлийн мэдээллийн сангийн аюулгүй байдал, архивын хамгаалалт, серверийн хүчин чадал, цахим системийн найдвартай ажиллагаанд онцгой ач холбогдол өгч, шаардлагатай төсөв хөрөнгө, техник технологи, хүний нөөцийн асуудлыг үе шаттайгаар шийдвэрлэхэд анхаарч ажиллана гэдгээ илэрхийлэв.
С.Амарсайхан сайд улсын бүртгэлийн үйлчилгээ үзүүлж буй хэн бүр шударга, нээлттэй, авлига ашиг сонирхлоос ангид байж иргэн төвтэй төрийн үйлчилгээг үзүүлэх учиртайг онцолж Улсын бүртгэлийн ерөнхий газрын ажилтан албан хаагчдад тодорхой үүрэг чиглэл өглөө.
Сэтгэгдэл (0)
Сэтгэгдэл бичигдээгүй байна