ХУТАГТ ЛАТТИМОР ХОЁР: ТИВ ДАМНАСАН ӨВ ТӨСЛИЙГ ЗАВХАН АЙМАГТ НЭЭЛЭЭ

Дилав хутагт сан, American Center for Mongolian Studies - ACMS төвөөс хамтран зохион байгуулж буй "Хутагт Латтимор хоёр: Тив дамнасан өв" төслийг Завхан аймагт нээлээ. 

Завхан аймгийн Засаг дарга Г.Өнөрбаяр, Дилав хутагт Данзанламэд, засаг даргын орлогч Д.Уужимсанаа нар уг ёслолыг нээж үг хэлэв.

Дээрх төслийн хүрээнд олон улсын эрдэм шинжилгээний хурлын илтгэгчид Завхан аймгийн иргэдэд Дилав хутагт Жамсранжавын амьдрал, үзэл санаа, соён гэгээрүүлэх үйл хэрэг, Монголын түүхэн үйл явцад баримталж асан байр суурь, мөн Оуэн Латтиморын Монгол судлал, олон улсын харилцаа, шашин, үндэсний үзлийн талаарх үзэл хандлагыг шинэ эх сурвалж, архивын баримтад тулгуурлан танилцуулав.

Тодруулбал, Пенсильванийн их сургуулийн профессор Кристофер Этвүүд “Бидний Монгол: Оуэн Латтимор, Дилав хутагт, Монгол нутаг, хэл бичиг”, Латтимор судлалын нийгэмлэгийн тэргүүн, доктор Ц. Батбаяр “Хутагт Латтимор нарын нөхөрлөл”, АНУ-ын Конгрессын номын сангийн Монгол номын хэлтсийн мэргэжилтэн М.Саруул-Эрдэнэ “Дилав хутагт соён гэгээрүүлэгч болох нь: Хутагтын АНУ дахь үйл хэрэг”, Харвардын их сургуулийн зочин судлаач, доктор Д.Дотно “АНУ-ын Харвардын их сургууль дахь “Пибоди” археологи, угсаатны зүйн музей дэх Оуэн Латтиморын цуглуулга, Чингис хааны тахилгын зан үйлийн талаарх гэрэл зургууд” сэдвээр тус тус илтгэл тавьжээ. 

Эрдэмтэд дотоод гадаадын архив, музей, их сургуулиудад хадгалагдаж буй ховор баримт, гэрэл зураг, захидал, судалгааны материалуудыг шинжлэх ухааны эргэлтэд оруулахын ач холбогдлыг онцлон тэмдэглэж, Дилав хутагтын өвийг олон улсын түвшинд цаашид хамтран судлах түгээн дэлгэрүүлэх шинэ боломжийг онцолсон байна.