Экологийн аюулгүй байдлыг хангах, хөрсний бохирдлыг бууруулах зорилгоор төвлөрсөн хогийн цэгүүдийг үе шаттайгаар ойжуулах, нөхөн сэргээх ажил Цагаан давааны хогийн цэгээс өнөөдөр /2026.05.16/ албан ёсоор эхэлж байна.
“Тэрбум мод” үндэсний хөдөлгөөний хүрээнд хэрэгжиж буй уг төслийн арга хэмжээг Монгол Улсын Ерөнхийлөгч У.Хүрэлсүх нээж хэлсэн үгэндээ “Газрын эх нь ус, усны эх нь мод гэдэг.
Уур амьсгалын өөрчлөлтийг сааруулах, цөлжилтийг бууруулахад мод тарих нь хамгийн үр дүнтэй арга гэдгийг дэлхий нийтээрээ хүлээн зөвшөөрөөд байна. Тиймдээ ч Монгол Улс тэрбум мод санаачилгыг дэвшүүлж, бүх нийтээрээ энэ үйлсийг дэмжиж, хамтран ажилласнаас хойш 130 орчим сая мод тариад байна. Газар, шороо, уул, усаа хамгаалах нь үндэсний тусгаар тогтнолоо хамгаалж буйн нэг хэлбэр юм.
Цагаан давааны хогийн цэгийг ойжуулж, иргэдийн эрүүл, аюулгүй орчинд амьдрах эрхийн баталгааг хангах, цаашлаад тэрбум мод санаачилгыг дэмжиж ирсэн та бүхэнд талархал илэрхийлье. Тэрбум мод санаачилгын хүрээнд идэвх санаачилгатай ажиллаж байгаа БОУАӨЯ болон Ойн газрын хамт олонд баярлалаа” гэлээ.
Харин БОУАӨ-ийн сайд Ц.Сандаг-Очир “Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 76 дугаар чуулганд оролцох үеэрээ Монгол Улс тэрбумаар тоологдох хэмжээний мод тарина гэж амлаж байсан.
Тухайн цаг үед хүн бүрт тэрбум гэдэг тоо хол мэт санагдаж, зарим нь шүүмжилж байсан. Гэтэл “Тэрбум мод” үндэсний хөдөлгөөн өрнөснөөс хойш 5-хан жилийн дотор монголчууд 130 гаруй сая мод тарьсан байна.
Нэг үгээр саяхан л мод тарих нь хүнд хэцүү, бас бүтэшгүй ажил мэтээр ойлгогддог байсан бол өнөөдөр ойрын зорилт, зорилго болж. Энэ утгаараа тэрбум модыг хэдхэн жилийн дотор тарьж чадахаар байна.
Тиймээс мод тарих үйлсэд та бүхэн итгэл зүтгэлтэй, санаачилгатай оролцоорой. Таны тарьсан, ургуулсан, арчилж, хамгаалсан нэг ч гэсэн мод цөлжилтийг бууруулж, уур амьсгалын өөрчлөлтийг сааруулахад том дэмжлэг болох юм шүү гэж уриалъя” гэв.
Бүх нийтээр мод тарих өдрийг тохиолдуулан Цагаан давааны хогийн цэгийг ойжуулах тус хэмжээнд төрийн болон хувийн хэвшил, мэргэжлийн холбоод, төрийн цэргийн болон хууль сахиулах байгууллагын ахмадын хороо зэрэг олон талт төлөөллийн 1100 гаруй хүн оролцож, нийт 3500 гаруй суулгац суулгалаа.
Улаанбаатар хотын төвлөрсөн хогийн цэг болох Цагаан даваа, Нарангийн энгэрийн 50 га талбайд нийт 870,584 ширхэг навчит модны суулгацыг хашлага хэлбэрээр тарихаар төлөвлөж байна.
Энэ хүрээнд Цагаан давааны хогийн цэгийн нийт 15 га талбайд 312,000 ширхэг хайлаас модны суулгац тарих юм.
Тус ажлыг ойн мэргэжлийн байгууллага “Хамтын төгөл” ХХК-ийн инженер, техникийн ажилчид гүйцэтгэх бөгөөд ойжуулалт хийснээр хогийн цэгийн тоосжилтыг барих, агаар дахь хорт бодисыг шүүх ургамлан хашлага бий болгох юм.
COP17 Mongolia
Ойн газар - National Forest Agency of Mongolia
Тэрбум мод үндэсний хөдөлгөөн албан хуудас
Сэтгэгдэл (0)
Сэтгэгдэл бичигдээгүй байна