ЗҮРХ СУДАСНЫ ТӨВ БАРИХ ЗАЙЛШГҮЙ ШААРДЛАГАТАЙ

 -ТИТЭМ СУДАСНЫ ХҮНД ХЭЛБЭРИЙН ХАГАЛГАА, ЗҮРХНИЙ ХЭМ АЛДАГДЛЫН ОНОШИЛГОО, ЭМЧИЛГЭЭНИЙ ТОО ӨСЖЭЭ-

Үндэсний хэмжээнд зүрх, мэдрэлийн лавлагаа төвийн үүргийг гүйцэтгэдэг Улсын гуравдугаар төв эмнэлгийн үйл ажиллагаатай Эрүүл мэндийн сайд С.Чинзориг хэд хоногийн өмнө танилцах үеэр тус эмнэлгийнхэн  өвчлөл, нас баралтын тэргүүлэх шалтгаан болж буй зүрх судасны өвчнийг бууруулахад Зүрх судасны төв барих зайлшгүй шаардлага байгаа талаар ярьжээ.

Тус эмнэлэг жилдээ 24 мянга гаруй хүнийг хэвтүүлэн эмчилж, 154 мянга шахам хүнд оношилгоо, эмчилгээ, 6500 орчим мэс засал хийдэг. Зүрх судасны мэс засал эмчилгээнд орох үйлчлүүлэгчийн тоо жилээс жилд нэмэгдэж дунджаар 330 гаруй нээлттэй хагалгааг хийж байна. Мөн титэм судасны хүнд хэлбэрийн хагалгаа, зүрхний хэм алдагдлын оношилгоо, эмчилгээний тоо өсөж байгаа аж.

Зүрх, мэдрэлийн үндэсний хэмжээний лавлагаа төвийн хувьд зүрхний шигдээс, тархины харвалтын төрөлжсөн тусламж үйлчилгээний ачаалал нэмэгдэж, мэдрэлийн мэс засал жилд 1500-гаас дээш тоогоор хийдэг нь гадагшаа явах урсгалыг бууруулахад тодорхой хувь нэмэр оруулж байгаа үзүүлэлт юм.

Люксембургийн Засгийн газрын буцалтгүй тусламжаар хэрэгжүүлсэн төслийн үр дүнд эрүүл мэндийн салбарын тулгамдсан асуудал, хүн амын нас баралтын тэргүүлэх шалтгаан болсон зүрх судасны өвчний оношилгоо, эмчилгээний чадавхи сайжирч, нас баралт 8,0 хувиар буурсан, зүрхний эмч нарын үндэсний сүлжээ бий болсон зэргийг  эмнэлгийнхэн танилцуулж байлаа. Эмнэлэг хооронд өвчтөн солилцох 13А маягтыг шаардахгүй болсноор ачаалал эрс ихэссэн, хөдөө орон нутгаас ирж буй зүрхний шигдээс, тархины харвалтын тохиолдлын 80 хувь нь тус эмнэлэгт ирж байгаа зэргийг эмч нар ярьсан.

Орон нутгаас ирж буй зүрхний өвчний тусламж үйлчилгээний ачааллыг жигд хуваарилахад анхаарах, ангиограф зэрэг зарим нэг өндөр өртөгтэй тоног төхөөрөмжтэй болоход дэмжлэг үзүүлэх, оношлогоо эмчилгээнд цацрагийн багаж тоног төхөөрөмж өргөн ашигладаг болсонтой холбоотойгоор эмнэлгийн физикч ажиллуулах зэрэг саналыг тавьсныг судалж, шийдвэрлэх үүргийг Эрүүл мэндийн сайд холбогдох хүмүүст өгсөн байна.