Шүүхийн шийдвэр гүйцэтгэх байгууллагаас санаачлан хорих ангид хүмүүжиж байгаа хоригдолд хөдөлмөрөөр дамжуулан хүмүүжлийн эерэг нөлөө үзүүлэх, тэдний авьяас, ур чадварыг нээн хөгжүүлэх, бүтээлч сэтгэлгээг дэмжих зорилгоор “Ухаарахуй, урлахуй” уран зураг, гар урлалын бүтээлийн үзэсгэлэнг хоёр дахь жилдээ гаргажээ.
Хууль зүй, дотоод хэргийн сайд С.Амарсайхан “Ухаарахуй, Урлахуй-2” үзэсгэлэнгээр зочилж, хүмүүжигч нарын уран бүтээлийг өнөөдөр /2026.05.08/ үзэж сонирхлоо.
Тус үзэсгэлэнд бүтэн сийлбэртэй гэр, эсгийгээр хийсэн гар урлалын бүтээл, уран зураг, модон сийлбэр зэрэг 196 бүтээлийг дэлгэсэн байна. Үзэсгэлэнгийн танхимд дэлгэсэн бүтээл бүр өөрийн гэсэн өнгө төрх, дурсамж, амьдралын түүхийг харуулж байгаагаараа онцлогтой юм.
“Ухаарахуй, Урлахуй-2” үзэсгэлэнг 2026.05.04-ний өдрөөс хойш 2000 орчим хүн үзэж сонирхсон бол 50 гаруй сая төгрөгийн уран бүтээлийг борлуулж, хүмүүжигч нарын дансанд шилжүүлснийг ШШГЕГ-ын дарга, хурандаа А.Намсаманд танилцуулав.
Түүнчлэн ШШГЕГ, Хөдөлмөр, халамжийн үйлчилгээний ерөнхий газартай хамтран хорих ангиас суллагдсан гарын дүйтэй хүмүүсийг ажлын байраар хангах, жижиг дунд үйлдвэрлэлийн 20 хүртэлх сая төгрөгийн зээл олгох зэргээр дэмжиж ажиллаж байна. Үүний үр дүнд 2026 оны эхний 5 сарын байдлаар 120 хүнийг ажлын байраар хангажээ.
Хууль зүй, дотоод хэргийн сайд С.Амарсайхан “Ухаарахуй – Урлахуй II” энэ бол зүгээр нэг үзэсгэлэн биш. Энэ бол алдаанаасаа ухаарч, амьдралаа дахин урлаж буй хүмүүсийн дотоод ертөнцийн гэрэл байна” хэмээн онцлоод ШШГЕГ-тай хамтран хүмүүжигч нарын уран бүтээл, авьяас, чадвар, хүмүүжлийн үйл хэргийг үргэлж бодлогоор дэмжиж, хамтарч ажиллана гэдгээ илэрхийллээ.
Сэтгэгдэл (0)
Сэтгэгдэл бичигдээгүй байна