​ ЭРҮҮЛ МЭНДИЙН САЛБАРЫН УДИРДАХ АЖИЛТНЫ ЗӨВЛӨГӨӨНӨӨР БОДЛОГО, ЧИГЛЭЛЭЭ ТОДОРХОЙЛНО

Жил бүр уламжлал болгон зохион байгуулагддаг “Эрүүл мэндийн салбарын удирдах ажилтны зөвлөгөөн” өнөөдөр /2026.03.30/ эхэллээ.

Эрүүл мэндийн яамнаас 2026 онд “Хүнлэг үйлчилгээ, Хүртээмжтэй тогтолцоо, Хариуцлагатай салбар” уриалгыг дэвшүүлж байна.

Зөвлөгөөнийг нээж Эрүүл мэндийн сайд Ж.Чинбүрэн хэлсэн үгэндээ, Эрүүл мэндийн сайдын эрхэм зорилго бол “эрүүл биетэй, урт настай, чанартай амьдралтай” ард түмэн юм. Үүний төлөө өнгөрсөн хугацаанд та бүхэнтэй нэг баг болж цөөнгүй ажлыг амжилттай хийж, гацаж урагшлахгүй удсан асуудлуудад гарц шийдэл олж шийдвэрүүдийг гаргаж чадлаа хэмээгээд зөвлөгөөнд хүрэлцэн ирсэн нийт удирдлагуудад мэндчилгээ дэвшүүлэв.

Хоёр өдөр үргэлжлэх уг зөвлөгөөнөөр эрүүл мэндийн салбарын удирдах ажилтнуудыг нэгдсэн мэдээллээр хангаж, салбарын тулгамдсан асуудлыг хэлэлцэн, цаашдын үйл ажиллагааны бодлого чиглэлээ тодорхойлох юм.

Зөвлөгөөнд УИХ-ын гишүүн, Засгийн газрын төлөөлөл, Ерөнхийлөгчийн ахлах зөвлөх, Эрүүл мэндийн яамны харьяа байгууллагууд, Төлөөлөн удирдах зөвлөл, төрөлжсөн мэргэшлийн эмнэлэг, үндэсний төвүүд, аймаг, нийслэлийн Эрүүл мэндийн газар, Нэгдсэн эмнэлэг, өрхийн эрүүл мэндийн төвүүд, хувийн хэвшлийн эмнэлгүүдийн төлөөлөл зэрэг 300 гаруй удирдах ажилтан оролцож байна.

ДЭМБ-ын Монгол Улс дахь Суурин төлөөлөгч ДР СОКОРРО ЭСКАЛАНТЕ "Өнөөдрийн удирдах ажилтны зөвлөгөөн "Хүнлэг үйлчилгээ, Хүртээмжтэй тогтолцоо, Хариуцлагатай салбар" гэсэн уриан дор явагдаж байгаа нь цаг үеэ оновчтой илэрхийлсэн гэж харж байна.

Эрүүл мэндийн сайд Ж.Чинбүрэн болон салбарын манлайлагч, удирдах ажилтан та бүхэн олон жилийн турш Монгол хүний эрүүл мэнд, сайн сайхны төлөө, эрүүл мэндийн тогтолцоог хөгжүүлэхийн төлөө чармайн ажилласны үр дүнд өнөөдрийн түвшинд хүрсэн гэдгийг онцлон тэмдэглэж, баяр хүргэе.

Эрүүл мэндийн удирдах ажилтнууд, эрүүл мэндийн салбарын албан хаагчид бол эрүүл мэнд, нийгмийн хөгжлийн “ар нуруу” нь болж байдаг гэдгийг өнөөдрийн зөвлөгөөний уриа тун оновчтой тодорхойлжээ. Эрүүл мэндийн тэгш байдлыг хангахын тулд хүн төвтэй, хүртээмжтэй, хариуцлагатай ажиллах хэрэгтэй юм." гэжээ.

"Эрүүл мэндийн салбарын удирдах ажилтны зөвлөгөөн" үргэлжилж байна.