МАЛИНИН: ОЛИМП ГАЙХАЛТАЙ ТУРШЛАГА БАЙСАН. ОДОО ӨӨРИЙНХӨӨРӨӨ БАЙХ ЦАГ ИРСЭН

Олимпын 2026 оны багийн тэмцээний аварга, Дэлхийн хошой аварга, АНУ-ын уран гулгагч Илья Малинин Прага дахь 2026 оны Дэлхийн аварга шалгаруулах тэмцээний  богино үзүүлбэрт хувийн амжилтаа эвдэж, 111.29 оноогоор тэргүүллээ.

Өмнө нь тэрбээр 2025 оны Дэлхийн аварга шалгаруулах тэмцээнд 110.41 оноо авсан юм.

Уран гулгалт. ДАШТ-2026. Эрэгтэй. Богино үзүүлбэрийн дүн

• 1. Илья Малинин /АНУ/ – 111.29
• 2. Адам Сяо Хим Фа /Франц/ – 101.85
• 3. Александр Селевко /Эстони/ – 96.49

Илья Малинин богино үзүүлбэрт түрүүлснийхээ дараа ярилцлага өгөхдөө “Уран гулгалтад их зүйл хийснээ ойлгосон. Одоо өөрийн замаараа явж, өөрийнхөөрөө байх, хүссэн зүйлээ хийх цаг болсон.” гэжээ.

Малинин “Мөсөн дээр дахин гарах нь үнэхээр гайхалтай байлаа. Би зүгээр л хөгжилтэй байж, таашаал авахыг хүссэн. Энэ тэмцээний өмнө ямар нэгэн хүлээлт надад байгаагүй. Зүгээр л гулгахыг хүссэн. Аварга цолоо хамгаалах нь үнэнийг хэлэхэд одоо надад тийм ч чухал биш. Сүүлийн хэдэн жилийн хугацаанд би энэ спортын төлөө маш их зүйл хийсэн гэдгээ ойлгосон. Харин одоо өөрийнхөөрөө байж, өөрийн замаар явж хүссэн зүйлээ хийх цаг ирсэн гэж бодож байна.” гэжээ.

Хувийн амжилтаа шинэчилсэн тухайд “Мэдээж өөрийн хязгаарыг давж гарах нь миний зорилгын нэг хэсэг хэвээр байгаа. Гэхдээ би “эцсийн эцэст улирал дуусна” гэж өөртөө хэлэх үедээ илүү сайн гулгадаг.” гэсэн байна.

Мөн "Би өөртөө их хүлээлт тавихгүй байхыг хичээдэг. Зүгээр л хийж байгаа, дуртай зүйлээсээ жинхэнэ таашаал авахыг хүсэж байна. Мэдээж, болж өнгөрсөн зүйлсийн талаар их боддог ч сайн мөчүүдийг ч бас боддог.

Ямар ч байсан цаашид юу болохыг харцгаая. Ер нь сайн, муу үе олон байсан болохоор би бүхнийг байгаагаар нь хүлээж авч байна.

Эцэст нь бид Олимпод оролцож чадсандаа бахархах ёстой. Би анхны Олимпдоо оролцсоноороо маш их бахархаж байгаа. Үр дүн ямар байснаас үл хамааран олон сайхан дурсамж, баяр баясгалантайгаар буцаж ирсэндээ баяртай байна. Энэ нь миний цаашдын бүх карьерын туршид урам зориг болно. Үзэгчдийн хариу үйлдэл надад одоо тийм ч чухал биш болсон. Миний анхаарах хамгийн чухал зүйл бол одоо дотроо өөрийгөө яаж мэдэрч байгаад л оршино. Хэрвээ би дотроо өөрийгөө сайн мэдэрч байвал үүнийг хүмүүст харуулж чадна. Тэгвэл тэд ч бас миний өөртөө мэдэрч байгаа хайр дэмжлэг бүхнийг мэдрэх болно.” гэжээ.