БАЯНЗҮРХИЙН СУРАГЧИД ИТХ-ЫН ТӨЛӨӨЛӨГЧӨӨР АЖИЛЛАЖ, ХҮҮХДИЙН ӨМНӨ ТУЛГАМДАЖ БУЙ АСУУДЛААР ТОГТООЛ БАТЛАВ

Баянзүрх дүүргийн Ерөнхий боловсролын ахлах ангийн сурагчид нэг өдөр дүүргийн иргэдийн Төлөөлөгчдийн Хурлын Төлөөлөгчөөр ажиллаж, дүүрэг орон нутагт, тэр дундаа хүүхэд залуусын өмнө тулгамдаж буй асуудлыг шийдвэрлэн тогтоол баталжээ. 

Бодлогод Залуусын Хяналт ТББ-ын дэргэдэх Залуусын Давлагаа клубээс Баянзүрх дүүргийн иргэдийн Төлөөлөгчдийн Хурал болон хурлын Ажлын албатай хамтран “Би Иргэдийн хурлын төлөөлөгч байсан бол?” хөтөлбөрийг амжилттай хэрэгжүүлсэн нь энэ аж. 

Клубийн гишүүн 15 сурагч хоёр сарын турш хуралдаанаар хэлэлцэх асуудлуудыг судалж, хэлэлцэхэд бэлдэж ажилласан байна. Баянзүрх дүүргийн иргэдийн Төлөөлөгчдийн Хурлын төлөөлөгчид сурагчдад ментор хийж, нутгийн өөрөө удирдах ёсны байгууллагын ажиллах чиг үүрэг, шийдвэр гаргах тогтолцоог тайлбарлаж, ойлгуулснаар тус хөтөлбөр амжилттай хэрэгжснийг хөтөлбөрийн оролцогч нар онцолсон юм. 

“Би Иргэдийн хурлын төлөөлөгч байсан бол?” хөтөлбөрийн хүрээнд хийсэн анхдугаар хуралдаанаар

• Замын хөдөлгөөний аюулгүй байдлыг хангах тухай
• Сургуулийн орчны аюулгүй байдлын стандартыг хангуулах, Шатахуун түгээгүүрийн станцын эрсдэлийг бууруулах тухай
• Хүүхэд залуучуудын чөлөөт цагаа зөв боловсон өнгөрүүлэх газар байгуулах тухай
• Үүсмэл хогийн цэгийг бууруулах тухай асуудлыг хэлэлцэж тогтоол баталжээ.