НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2026.03.16-2026.03.22/ өрнөсөн үйл явдлаас заримыг нь тоймлон хүргэж байна.
ЦЭНХЭР БҮСИЙН СЭДЭВЧИЛСЭН ӨДРҮҮД, ҮЙЛ АЖИЛЛАГААНЫ ХӨТӨЛБӨРИЙГ ТАНИЛЦУУЛАВ
Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хурал (COP17) болохоос таван сарын өмнө ЦЭНХЭР БҮС-ийн сэдэвчилсэн өдрүүд болон үйл ажиллагааны хөтөлбөрийг олон нийтэд 2026 оны гуравдугаар сарын 17-ны өдөр танилцууллаа.
Санхүүжилтийн өдөр (8 дугаар сарын 24)
Усны өдөр (8 дугаар сарын 25)
Газар ба хүн төвт өдөр (8 дугаар сарын 26)
Хүнсний систем ба хөрсний эрүүл мэндийн өдөр (8 дугаар сарын 27)
ЦАХИМ БЭЛТГЭЛ АЖЛЫН ТАЛААР ХУРАЛДЛАА
Цахим хөгжил, инновац, харилцаа холбооны яам Цөлжилттэй тэмцэх тухай НҮБ-ын конвенцын (UNCCD) Талуудын 17 дугаар хурлын бэлтгэл ажлын хүрээнд ажлын хэсгийн уулзалтыг зохион байгуулж, UNCCD-ийн Гүйцэтгэх нарийн бичгийн даргын орлогч хатагтай Андреа Меза Мурильо болон тус конвенцын төлөөлөгчдийг хүлээн авч уулзжээ.
Цахим хөгжил, инновац, харилцаа холбооны дэд сайд Г.Баярхүү СОР17 хурлын албан ёсны вэб сайтын хөгжүүлэлт, дэд бүтцийн бэлтгэл, медиа төвийн төлөвлөлт, мөн олон улсын хэвлэл мэдээлэл болон олон нийтэд мэдээллийг шуурхай, хүртээмжтэй хүргэх харилцаа холбоо, мэдээллийн үйл ажиллагааг зохион байгуулах бэлтгэл ажлын явцыг танилцууллаа. Мөн СОР17 хурлын үеэр зохион байгуулагдах Ногоон бүсийн медиа төлөвлөлтийг зохион байгуулах нь чухал ач холбогдолтой болохыг онцлов.
Тус яам COP17 хурлын бэлтгэл ажлын хүрээнд мэдээлэл, харилцаа холбоо, дижитал платформын зохион байгуулалтыг хангах чиглэлээр холбогдох байгууллагуудтай хамтран ажиллаж байгаа юм. Уулзалтын үеэр бага хурлын видео, аудио системийн бэлтгэл, хэвлэл мэдээллийн байгууллагуудад зориулсан шууд дамжуулалтыг зохион байгуулах техникийн шийдлийн талаар хэлэлцсэн байна. Энэ хүрээнд РТҮС УТҮГ-ийн Гүйцэтгэх захирал Ц.Пүрэвням бага хурлын үйл ажиллагааг телевиз болон цахим сувгуудаар шууд дамжуулах техникийн боломж, зохион байгуулалтын талаар танилцуулжээ.
UNCCD-ийн Гүйцэтгэх нарийн бичгийн даргын орлогч хатагтай Андреа Меза Мурильо энэ үеэр Монгол Улс төлөөлөгчдийг халуун дотноор хүлээн авч байгаад талархал илэрхийлж, COP17 хурлыг зохион байгуулах бэлтгэл ажлыг хангахад талуудын уялдаа холбоо, хамтын ажиллагаа чухал ач холбогдолтойг онцлон тэмдэглэсэн байна.
Уулзалтын төгсгөлд талууд COP17 хурлын бэлтгэл ажлыг уялдуулан зохион байгуулах, мэдээлэл солилцоог эрчимжүүлэх, хамтын ажиллагааг бэхжүүлэх чиглэлээр цаашид нягт хамтран ажиллахаар санал нэгджээ.
ОРОН НУТГИЙН СЭТГҮҮЛЧДИЙГ ЦӨЛЖИЛТ, БАЙГАЛЬ ОРЧНЫ ЧИГЛЭЛЭЭР МЭРГЭШҮҮЛЭХ СУРГАЛТ ХИЙВ
Байгаль орчин, уур амьсгалын өөрчлөлтийн яам, Цөлжилттэй тэмцэх тухай НҮБ-ын Конвенцын Талуудын 17 дугаар бага хурлыг зохион байгуулах Үндэсний хорооны Ажлын алба “Конрад-Аденауэр сан”-тай хамтран “Сэтгүүлчдийг цөлжилт, байгаль орчны чиглэлээр мэргэшүүлэх сургалт”-ын гурав дахь удаагийн сургалтыг 3 дугаар сарын 17-19-ний өдрүүдэд зохион байгуулжээ.
Энэ удаагийн сургалтад 19 аймгийн телевиз, радио, сонин, сайт зэрэг хэвлэл мэдээллийн байгууллагаас нийт 36 сэтгүүлч хамрагдаж, COP17 Монгол Улсад зохион байгуулах болсон шалтгаан, ач холбогдол, олон улсад танилцуулах санал санаачилгын талаар мэдээлэл авчээ.
Мөн COP17-г эх орондоо зохион байгуулах явцад сэтгүүлчид анхаарвал зохих асуудлууд, тухайн улс орны иргэд тодорхой мэдлэг мэдээлэлтэй байхын давуу тал, боломж, ЦЭНХЭР болон НОГООН бүсийн ялгаа, дэлхий дахинд цөлжилт, газрын доройтол ямар хэмжээнд хүрсэн, улс орнуудад үзүүлж буй нөлөөлөл, энэ чиглэлд НҮБ-аас баримталж буй гол бодлого, чиг хандлагын талаар танилцуулж, салбарын мэргэжилтнүүд сэтгүүлчдийн сонирхсон асуултад хариулсан байна.
Сэтгүүлчид зургаан багт хуваагдан COP17-гийн хүрээний асуудлуудаар хэлэлцүүлэг өрнүүлж, баг бүрийн ажиллагааны дутагдалтай болон давуу талыг тодорхойлж, сайжруулалт хийх, цөлжилт, уур амьсгалын өөрчлөлтийн асуудлыг төр засаг, шийдвэр гаргагчид болон иргэд, олон нийтэд хүргэх хамгийн оновчтой аргыг тодорхойлох зэргээр олж авсан мэдлэгээ баталгаажуулжээ.
НҮБ-ЫН КОНВЕНЦЫН ДЭД ГҮЙЦЭТГЭХ НАРИЙН БИЧГИЙН ДАРГА БЭЛТГЭЛ АЖЛЫН ЯВЦТАЙ ТАНИЛЦЖЭЭ
Цөлжилттэй Тэмцэх Тухай НҮБ-ын Конвенцын Дэд гүйцэтгэх нарийн бичгийн дарга Андреа Меза Мурильогоор ахлуулсан төлөөлөгчид 17 дугаар бага хурлыг зохион байгуулах Үндэсний хорооны Ажлын албаны бэлтгэл ажлын явцтай танилцжээ. Уулзалтын үеэр бэлтгэл ажлыг эрчимжүүлэх, уялдаа холбоог сайжруулах, олон улсын түвшний зохион байгуулалтыг хангах чиглэлээр тодорхой зөвлөмж, үүрэг чиглэл өгч, цаашдын хамтын ажиллагааг илүү идэвхжүүлэхээр санал нэгдэв.
Сэтгэгдэл (0)
Сэтгэгдэл бичигдээгүй байна