Сүрьеэтэй тэмцэх дэлхийн өдөрт зориулсан "Сүрьеэгээр өвчилсөн иргэдийн бодлого боловсруулагчдад дайх үг" сэдэвт өглөөний уулзалт өнөөдөр /2026.03.19/ боллоо.
Эрүүл мэнд нийгмийн бодлогын хүрээлэн нь Эрүүл мэндийн яам, “Глобаль” сангийн дэмжлэгтэйгээр “Сүрьеэгийн тусламж үйлчилгээнд олон нийтээр удирдуулсан хяналтын тогтолцоо (ОНУХ)-г бий болгох” төслийг хэрэгжүүлэн ажиллаж байгаа юм.
Төслийн хүрээнд сүрьеэгээр өвдсөн, даван туулсан иргэдээс сар тутам тусламж үйлчилгээг сайжруулах чиглэлээр мэдээлэл цуглуулж, судалгаа авдаг ба 2026 оны 3 сарын 6-ны байдлаар 3541 дата мэдээллийг цуглуулж дүн шинжилгээ хийжээ.
Энэхүү судалгаа мэдээллээс харахад сүрьеэгээр өвчилсөн ч эмчилгээ хийлгэдэггүй төрийн бодлогын гадна үлдсэн иргэд болон эмчилгээ хийлгэж байгаа халдвартай иргэдэд төрөөс үзүүлэх нийгмийн халамжийн үйлчилгээ үгүйлэгдэж буй нь судалгаанд хамрагдсан иргэдийн тулгамдсан асуудлуудын нэг болсон аж.
Тухайлбал, нэг жишээ авъя. Дөрвөн хүүхэдтэй өрх толгойлсон эмэгтэй сүрьеэгээр оношлогдож, хүүхдүүд нь мөн сүрьеэгийн эм уух болов. Ээж нь өвдсөнөөс ажил хийх аргагүй болж, энэ өрх хүүхдийн 100 мянга, гурав хүртэлх насны хүүхэдтэй ээжид сар бүр олгодог “Цалинтай ээж”-ийн 50 мянга, нийт сард 450 мянган төгрөгийн орлоготой болжээ. Түрээсийн байрандаа сард нэг сая төгрөг төлдөг байсан бол чадахаа больж, ажил хийж амьдралаа залгуулдаг ээж нь өвдсөнөөс энэ өрх хүнд байдалд ороод байна. Хүүхдүүдийн аав байдаг ч архины хамааралтай учир гэртээ ирдэггүй бөгөөд халамж авах нөхцөл хуулийн дагуу бүрдээгүй.
Төрөөс үзүүлдэг 70 гаруй төрлийн халамжийн аль нь ч ийм иргэдэд үйлчилдэггүй байна.
Эрүүл мэнд нийгмийн бодлогын хүрээлэнгээс сүрьеэгээр өвчилсөн иргэдэд төрөөс анхаарал тавьж, нийгмийн халамжийн тусгай бодлого хэрэгжүүлэх зүй ёсны шаардлага тулгарч буйг бодлого боловсруулагч, шийдвэр гаргагчдад хүргэхийг зорьж байна.
Сэтгэгдэл (0)
Сэтгэгдэл бичигдээгүй байна