Баян-Өлгий аймгийн эрүүл мэндийн салбарт 1700 гаруй эмч, эмнэлгийн ажилтан ажиллаж байна. Тус аймагт 130 гаруй эрүүл мэндийн байгууллага үйл ажиллагаа явуулж байгаа юм.
Улаанбаатар хотоос 1700 орчим км-ийн зайд амьдарч буй 120 мянга гаруй иргэнд эрүүл мэндийн тусламж, үйлчилгээ үзүүлдэг салбарын эмч, ажилчдын ажлын орчин нөхцөл, тулгамдаж буй асуудал, санал хүсэлтийг Эрүүл мэндийн сайд Ж.Чинбүрэн сонсож, ярилцлаа.
Уулзалтад Баян-Өлгий аймгийн 13 сумын Эрүүл мэндийн төвийн удирдлага, ажилтнууд, аймгийн төвийн Өрхийн эрүүл мэндийн төвүүдийн төлөөлөл, Нэгдсэн эмнэлгийн эмч, ажилчид болон хувийн хэвшлийн эмнэлгийн төлөөлөл оролцож, санал бодлоо илэрхийлэн асуулт асууж, сайдаасаа шууд хариулт авлаа.
Уулзалтын үеэр түргэн тусламжийн автомашины жолооч нарт орон нутгийн нэмэгдэл олгох, сумдыг туулах чадвар сайтай автомашинаар бүрэн хангах, зарим сумдын Эрүүл мэндийн төвийн барилгыг шинэчлэх, засварлах зэрэг асуудлыг түлхүү хөндөн ярив.
Мөн Баян-Өлгий аймагт хувийн хэвшлийн эрүүл мэндийн байгууллагын тоо харьцангуй олон байдаг бөгөөд тэдгээрийн төлөөлөл даатгалын санхүүжилтийн үргэлжлэлтэй холбоотой асуудлаар асуулт тавьж, холбогдох хариултыг авсан юм.
Уулзалтын үеэр Эрүүл мэндийн сайд Ж.Чинбүрэн салбартаа хэрэгжүүлж буй бодлого, үйл ажиллагаагаа танилцуулж, Баян-Өлгий аймгийн Цагааннуур, Цэнгэл сумдын Эрүүл мэндийн төвийг Азийн хөгжлийн банкны төслийн хүрээнд шинээр барихаар шийдвэрлэж байгааг мэдээллээ.
Сэтгэгдэл (0)
Сэтгэгдэл бичигдээгүй байна