БҮРГЭДЧИД ГУРВАН ТӨРӨЛД ӨРСӨЛДӨЖ, МОРЬТ ХАРВАА, АНЧ НОХДЫН ҮЗҮҮЛБЭР БОЛНО

-БҮРГЭДИЙН БАЯР РУУ ҮНЭГҮЙ АВТОБУСААР ҮЙЛЧИЛНЭ-

БОАЖЯ, Нийслэлийн Аялал жуулчлалын газар болон бусад газар хамтран зохион байгуулж буй “Бүргэдийн баяр-2024” наадам эхэллээ. Тус наадам нь тэмцээн, уралдааны хэлбэрээр зохион байгуулагддаг бөгөөд бүргэдчид тулам булаацалдах, газраас зоос шүүрэх, бүргэдээр хиймэл ан бариулах гэсэн гурван төрөлд өрсөлдөнө. Түүнчлэн морьт харваа, анч нохдын үзүүлбэр, хоол хүнс, гар урлалын бүтээгдэхүүнүүдийн үзэсгэлэн худалдаа, бусад үйлчилгээг дэлгээд байна. Мөн нээлтийн үеэр шилдэг 21 бүргэдчинийг алдаршуулсан юм.

“Бүргэдийн баяр-2024” наадам өнөөдөр, маргааш хоёр өдрийн турш буюу гуравдугаар сарын 9, 10-нд 11:00-18:00 цагийн хооронд “Чингис хааны хүрээ” аялал жуулчлалын цогцолборт болно. Махчин шувууг гаршуулан сургаж, ан ав хийж ирсэн энэхүү уламжлалт арга ухааныг “Шувуучлахуй” хэмээн нэрлэдэг. Эл уламжлал нь Төв Азийн нүүдэлчдийн дунд 6000 жилийн өмнө үүсэж, өдгөө хүртэл хадгалагдаж иржээ. Манай улс уг уламжлалыг 2010 онд ЮНЕСКО-ийн Хүн төрөлхтний Соёлын биет бус өвийн төлөөллийн жагсаалтад албан ёсоор бүртгүүлсэн байна.

Дашрамд дурдахад наадмын үеэр "Ulaanbaatar city bus" иргэдэд үнэ төлбөргүй үйлчилнэ. Автобус 3 сарын 9, 10-ны өглөө 10 цагт Сүхбаатарын талбайн урд талын авто зогсоолоос тус баяр зохион байгуулагдаж буй "Чингис хааны хүрээ" рүү хөдөлж, оройн 17 цагаас хот руу буцна.