ГИЙОМ СИЗЕРОН ХОЁР ӨӨР ХАМТРАГЧТАЙ ОЛИМПЫН АВАРГА БОЛСОН АНХНЫ УРАН ГУЛГАГЧ БОЛЖ, ТҮҮХ БҮТЭЭВ

Францын уран гулгагч Гийом Сизерон мөсний бүжгийн төрөлд өөр өөр хамтрагчтайгаар Олимпын хошой аварга болсон анхны тамирчин болж, түүхэн амжилт тогтоолоо.

Милан, Кортина-2026 Өвлийн олимпын наадамд Сизерон Лоранс Фурнье Бодритой хослон түрүүлсэн бөгөөд тэд анх удаа хамтран олимпод оролцож байгаа нь энэ юм. 

Өмнө нь Гийом Сизерон:

• 2022 оны Бээжингийн Олимпод Габриэла Пападакистай хослон алтан медаль хүртсэн. Тэд 2008 оноос хамт бэлтгэл хийж, тэмцээнд оролцож байсан юм. 

• 2018 оны Пёнчаны Олимпод мөн Пападакистай хамт мөнгөн медаль хүртэж байсан билээ. 

Ингэснээр Сизерон хоёр өөр хамтрагчтайгаар олимпын аварга болсон анхны уран гулгагч болж, спортын түүхэнд шинэ амжилт тогтоолоо.

Францын хос гулгагчид Олимпын наадмын уран гулгалтын мөсний бүжгийн төрөлд түрүүлсний дараа сэтгэл хөдлөлөө барьж чадаагүй бөгөөд Бодри ялагчдыг зарлах мөчид өөрийн эрхгүй нулимс асгаруулсан юм. 

Гийом Сизерон Фурнье Бодри нар ширүүхэн өрсөлдөөний эцэст үзүүлбэрийн нийлбэр дүнгээр 225.82 оноо авч, АНУ-ын туршлагатай уран гулгагчид болох Мэдисон Чок, Эван Бэйтс нарыг ердөө 1.43 онооны зөрүүгээр ялж, алтан медаль хүртсэн юм.

Онооны үзүүлэлт

• 1. Франц (Гийом Сизерон / Лоранс Фурнье Бодри )—225.82 
•  2. АНУ (Мэдисон Чок / Эван Бэйтс) — 224.39
•  3. Канад (Пайпер Гиллес / Поль Пуарье) — 217.74