XVII жарны “Сүрээр дарагч" хэмээх гал морин жилийн сар шинийн баярт зориулсан ахмад бөхчүүдийн барилдаанд Төв аймгийн Сэргэлэн сумын харьяат, Ээлт хан галын бөх, Монгол Улсын гавьяат тамирчин, Дархан аварга Агваансамдангийн Сүхбат түрүүлж, Архангай аймгийн Эрдэнэмандал сумын харьяат, Бөхбилэгт дэвжээний бөх, аймгийн арслан Чойжилын Эрдэнэчулуун үзүүрлэлээ.
Дархан аварга Агваансамдангийн Сүхбат Монголын бөхийн өргөөнд зодоглосон нь бөхөд хайртай ард түмэн, үзэгч олныг баярлуулсан юм.
Дархан аварга А.Сүхбат түрүүлснийхээ дараа өгсөн ярилцлагадаа "Монгол бөхийн өргөөнд барилдах шийдвэрийг өчигдөр гарсан. Хүү маань 15-16 насны хүүхдийн барилдаанд барилдъя гээд хамт явъя гэсэн чинь Ахмад бөхчүүдийн барилдаан болж байгаа юм байна гээд...Ойрд ирээгүй, бас нэг үеийн үхэр хонин жилтнүүдтэйгээ барилдаж нэг удаа хөлсөө гаргах ажлаа хийдэг юм уу гээд зориод ирсэн.
Идэр залуу насны минь дурсамж Монгол бөхийн өргөөнд өнгөрсөн. Намайг дэмжиж байдаг хүмүүс миний ар талд ирж, баяр хүргэлээ. Бүгдэд нь баярлаж байна. Бөхийн өргөөнд нийтдээ 55 удаа түрүүлсэн байдаг. Өнөөдөр түрүүгээ дахин нэмсэндээ баяртай байна.
Их сайхан жил гарах гэж байна, морин жил гэдэг бол... Монголын өнө эртний түүхүүд дандаа морьтойгоо л хамт байдаг. Монгол хүн дэлхийн дайдад явган яваагүй юм ш дээ, морьтойгоо л явж байсан. " гээд Монголын нийт ард түмэндээ Сар шинийн баярын мэндчилгээ дэвшүүлж, сайхан амьдрахын ерөөл өргөсөн юм.
Сэтгэгдэл (0)
Сэтгэгдэл бичигдээгүй байна