Америкийн уран гулгагч Илья Малинин Өвлийн олимпын наадмын багийн тэмцээний чөлөөт үзүүлбэрт өчигдөр /2026.02.08/ түрүүлснээр АНУ багийн тэмцээнд аваргаллаа.
Илья Малинин үзүүлбэрээ төгс гүйцэтгээгүй ч 200.03 оноо авч, чөлөөт үзүүлбэрийн ялагч болсон байна. Хоёрдугаар байрт Японы уран гулгагч Шун Сато 194.86 оноогоор орсон бол гуравдугаар байрыг Италийн Маттео Риццо 179.62 оноогоор эзэлжээ. Харин Гүржийн төлөөлөгч, Оросын дасгалжуулагч Этери Тутберидзегийн шавь Ника Егадзе 154.79 оноо авч, тавдугаар байрт шалгарсан байна.
Чөлөөт үзүүлбэрийн уран гулгалтын тэмцээн нь багийн тэмцээний сүүлийн төрөл байсан юм. Илья Малинины энэ үзүүлбэрийн ачаар АНУ-ын шигшээ баг 69 оноогоор нэгдүгээр байр эзэлж, Япон 68 оноотойгоор хоёрдугаар, Итали 60 оноотойгоор гуравдугаар байрт оржээ.
Илья нь 2004 оны 12-р сарын 2-нд Виржиниа мужийн Фэрфакс хотод төрсөн бөгөөд эцэг эх нь орос уран гулгагчид Татьяна Малинина, Роман Скорняков нар юм. Илья англи, орос хэлээр чөлөөтэй ярьдаг.
Тэрбээр 2023 онд дэлхийн аваргын хүрэл медаль хүртсэн бол 2024, 2025 онд дэлхийн аваргад түрүүлсэн, дэлхийн хошой аварга. 2022 онд Гран-пригийн финалын хүрэл медаль хүртсэн бол 2023-2025 онд гурван жил дараалан түрүүлсэн, 2022 онд АНУ-ын аваргын мөнгөн медаль хүртэж, 2023-2026 онд түрүүлсэн, АНУ-ын дөрвөн удаагийн аварга 2022 оны өсвөрийн дэлхийн аварга, 2023, 2025 оны багийн дэлхийн аваргын ялагч юм.
Малинин нь уран гулгалтын түүхэнд албан ёсны тэмцээнд дөрөв эргэлттэй акселийг амжилттай гүйцэтгэсэн анхны тамирчин болсон. Түүнчлэн богино хөтөлбөрт дөрөв эргэлттэй аксель-ийг гүйцэтгэсэн анхны бөгөөд цорын ганц уран гулгагч юм.
Тэрбээр мөн тэмцээний хүрээнд бүх төрлийн дөрөв эргэлттэй үсрэлтийг (аксель, риттбергер, сальхов, лутц, тулуп, флип) гүйцэтгэсэн анхны бөгөөд цорын ганц тамирчин болжээ. Мөн Нэйтан Чений дараа нэг хөтөлбөрт зургаан дөрөв эргэлттэй үсрэлт гүйцэтгэсэн түүхэн дэх хоёр дахь уран гулгагч, харин долоон дөрөв эргэлттэй үсрэлт нэг хөтөлбөрт амжилттай гүйцэтгэсэн анхны бөгөөд цорын ганц уран гулгагч юм.
Илья Малинин 238.24 оноогоор чөлөөт хөтөлбөрийн дэлхийн дээд амжилтыг эзэмшигч бөгөөд 2025 оны 12-р сарын 25-ны байдлаар Олон улсын тэшүүрийн холбоо (ISU)-ны чансаагаар дэлхийд тэргүүн байрт бичигдэж байна.
Сэтгэгдэл (0)
Сэтгэгдэл бичигдээгүй байна