Эрүүл мэндийн сайдын 2024 оны 9 дүгээр сарын 3-ны өдрийн А/375 дугаар тушаалаар Монгол Улсад нярайн өвчлөл, эндэгдлийг бууруулах зорилго бүхий үндэсний 5 баг байгуулагдсан бөгөөд 2024-2025 онд хийгдсэн томоохон ажлуудын үр дүн болон 2026-2028 оны төлөвлөлттэй танилцахаар Эрүүл мэндийн дэд сайд Г.Номин санаачлан үндэсний багуудын хамтарсан уулзалтыг зохион байгуулжээ.
Дээрх үндэсний 5 баг нь нярайн өвчлөл, эндэгдлийн тэргүүлэх шалтгаан болсон нярайн тархины хүчилтөрөгчийн дутагдал, нярайн амьсгал гачаалын хамшинж, зүрхний төрөлхийн хавсарсан хүнд гажиг, дутуу төрөлтөөс урьдчилан сэргийлэх арга хэмжээ, нярайн эрт илрүүлгийг зохион байгуулж, шинэ эмчилгээ, оношилгоо, дэвшилтэт технологийг Монгол Улсад нэвтрүүлэн, нутагшуулж нотолгоонд суурилсан цогц тусламжийг үзүүлэх тогтолцоог бүрдүүлээд байна.
Тухайлбал, Монгол Улсад эмчлэгдэх боломжгүй өвчний жагсаалтад орсон “Хүүхдийн хавсарсан хөх, хүнд хэлбэрийн гажгийн үеийн мэс засал эмчилгээ”-г ЭХЭМҮТ-д нутагшуулахаар ажиллаж байна. Монгол Улсын хэмжээнд нийт 16 нярайд тархи хөргөх эмчилгээ хийгдсэн, нийт 98 нярайд тархины цахилгаан бичлэг хийгдэж, таталтын голомт оношлогдсон байна.
Нярайн цогц скринингийн үндэсний баг нь 6 төрлийн үндсэн скринингийг улс даяар нэгдсэн стандарт бүхий цогц тогтолцоогоор, нярайн эрүүл мэндийн урт хугацааны хүндрэл, эндэгдлийг бууруулах стратеги бүхий үйл ажиллагаа болгон эхлүүлсэн юм. Ингэснээр хүүхдэд амьдралын чанар хадгалагдана, насан туршийн хөгжлийн бэрхшээлээс сэргийлнэ, гэр бүлд асаргааны зардал буурна, нийгмийн халамжаас хамаарах байдал багасна, эрүүл мэндийн тогтолцоонд хожуу үеийн үнэтэй эмчилгээ багасна, мэргэшсэн тусламжийн ачаалал буурах ач холбогдолтой.
Ази, Номхон далайн бүсийн орнуудын нярайн скрининг (Newborn Screening, NBS)-ийн тогтолцоог бэхжүүлэх зорилготой “Нярайн скринингийн хүчин чармайлтыг нэгтгэх 8 дахь удаагийн уулзалт-семинар” 2026 оны 01 дүгээр сарын 12–16-ны өдрүүдэд Вьетнам Улсын Ханой хотод болсон юм.
Семинарт БНХАУ, Филиппин, Энэтхэг, Монгол, Индонез, Бангладеш, Пакистан, Непал, Вьетнам, Лаос, Мьянмар зэрэг орнууд нярайн скринингийн хөтөлбөрийн өнөөгийн байдал, ололт амжилт, тулгамдсан асуудлаа танилцуулж, нээлттэй хэлэлцүүлэг хийсэн байна.
Энэхүү үйл ажиллагаанд Монгол Улсын Эрүүл мэндийн дэд сайд Г.Номин, ЭМЯ-ны дэргэдэх Нярайн цогц скринингийн үндэсний багийн ахлагч, АШУҮИС-ийн АУС-ийн Хүүхдийн анагаахын тэнхимийн эрхлэгч, АУ-ны доктор, профессор Г.Эрдэнэтуяа нар оролцож, өөрийн оронд хэрэгжиж буй нярайн цогц скринингийн талаар танилцуулсан юм.
Бүс нутгийн хамтын ажиллагааг гүнзгийрүүлэх зорилготой “Ханойн тунхаглал 2026”-ын төслийг боловсруулж, эцэслэн батлав. Тунхаглалд улс орнуудын хамтын ажиллагаа, бодлогын дэмжлэг, тогтвортой санхүүжилт, хүний нөөцийн чадавхийг сайжруулах чиглэлүүдийг тусгасан байна.
Энэхүү семинар нь Ази, Номхон далайн бүс нутагт нярайн скринингийн хөтөлбөрийг өргөжүүлж, удамшил, дотоод шүүрэл, бодисын солилцооны өвчнийг эрт илрүүлэх замаар хүүхдийн эрүүл мэндийг хамгаалах хамтын зорилгыг нэгтгэхэд чухал ач холбогдолтой гэж үзэж байна.
Сэтгэгдэл (0)
Сэтгэгдэл бичигдээгүй байна