Х.БАЯНМӨНХ АВАРГЫН 1972 ОНЫ ЯРИЛЦЛАГА

Өнөөдөр буюу хоёрдугаар сарын 2-ны өдөр Монгол Улсын дархан аварга Хорлоогийн Баянмөнхийн мэндэлсэн өдөр юм. 

Энэ өдөр бид Монголын ард түмний хайр хүндэтгэлийг хүлээсэн алдарт дархан аваргын 1972 оны наадмын өмнө "Орчин үеийн Монгол Улс" сэтгүүлд өгсөн ярилцлагыг онцолж байна.  

“Түрүүлэх боломж бол бий. Гэхдээ зүгээр өмнө ирээд ойчоод өгдөг бөх гэж байдаггүй. Тийм дээр хүрвэл барилдааны утга учир нь алдагдах шүү дээ. Ардынхаа хувьсгалын их баяр наадамд юу юунаас илүү бэлдэж байна” гэж Дархан аварга Хорлоогийн Баянмөнх 1972 оны наадмын өмнө “Орчин үеийн Монгол улс” сэтгүүлд ярилцлага өгөхдөө хэлжээ.

Тэр жил Мюнхений олимптой. Олимпод явахаасаа өмнө улсын наадамдаа зодоглох тухай нь асуухад дархан аварга ийм хариулт өгч байсан аж.

Сурвалжлагч ярилцлагын төгсгөлд чимэг болгон “Хоёр хүүгээ бөх болгоно гэнэ. Охидоо хэлний мэргэжилтэй болбол сайнсан гэж ярьж байна. Энэ бол эцгийн л бодол шүү дээ. Хойтон их хүү нь сургуульд орно” хэмээн бичжээ.

1972 оны тэр наадамд дархан аварга Х.Баянмөнх түрүүлж, дархан аварга Ж.Мөнхбат үзүүрлэсэн юм. Шөвгийн дөрөвт дархан аварга Д.Дамдин, улсын арслан Ж.Хайдав нар шалгарч байлаа.
Харин Мюнхений олимп наймдугаар сарын сүүлчээр эхэлж, Х.Баянмөнх аварга олимпын алтан медалийн төлөө ЗХУ-ын домогт бөх Иван Ярыгинтай барилдаж, мөнгөн медаль хүртсэн түүхтэй билээ.