ХХ зууны сүүлчээр чөлөөт бөхийн ертөнцөд Бувайсар Сайтиев хаанчлалаа бүрэн тогтоосон байлаа. Харин дүү Адам Сайтиев нь тухайн үед бие халаалт хийж байсан гэвэл зөв болох биз ээ.
Адам том тэмцээнд оролцож, туршлага сууж, шилдэг бөхчүүдтэй барилдаж, өрсөлдөж сурч байлаа.
Ах дүү хоёр хоёулаа ижил жинтэй байсан нь гол асуудлын нэг байв. Нэг завинд хоёулаа суух боломжгүй учир 1998 онд Бувайсар дээд жин рүүгээ орж, харин Адам Европын АШТ-д жиндээ барилдсан юм.
Харин дараа жил нь ах дүү хоёр жингээ эргээд солилоо. Адам дээд жин рүү шилжихээр болж, Бувайсар жиндээ үлдэв. Адам ахыгаа чөлөөт бөхийн түүхийг шинээр хурц тодоор үргэлжлүүлэн бичиг гэж бодсон биз.
Ингээд төлөвлөсний дагуу 1999 оны ДАШТ-д Бувайсар жиндээ барилдахаар боллоо. Гэвч тэмцээн эхлэхээс хэдхэн хоногийн өмнө тавхайндаа гэмтэл авч, дэлхийн дэвжээнээ гарч чадахааргүй болжээ. Энэ нөхцөлд ахыгаа Адам ахыгаа орлож, ДАШТ-д очлоо.
“Дэлхийд шилдэг нь очиж барилдах ёстой. Нэгэнтээ би гэмтсэн болохоор шийдвэр ойлгомжтой болсон. Адам миний оронд явсан” гэж Бувайсар Сайтиев ярьжээ. Дүүгээ мөн баг тамирчдаа хэрхэн ДАШТ-д оролцохыг үзэхээр Бувайсар очжээ.
Ингээд Адам Сайтиев Дэлхийн аварга боллоо. Тэр үед сэтгүүлч Адамаас “Ахынхаа өмнө барилдах хэцүү байв уу?” гэж асуужээ. “Ах маань гэж бодсондоо биш, харин яасан ч ялагдахааргүй бөхийг орлож ирсэн болохоор ялагдаж болохгүй гэдгээ агшин ч марталгүй хичээлээ. Надад ялагдах эрх байгаагүй” хэмээн Адам хариулсан байна.
Буцахаар онгоцоор нисэж явахад сэтгүүлч Бувайсар Сайтиевтай энэ талаар ярилцжээ. Тэгэхдээ Адамын хэлсэн тэдгээр үгсийг дуулгасан байна. Бувайсар дүүгийнхээ юу хэлснийг сонсоод царай нь их өөр болсон гэнэ.
Адам дуу муутай болохоор дотор сэтгэлээ нээж гаргаад байх нь ховор юмсанж. Дүүгийнхээ тэгж хэлснийг сонсоод Бувайсар “Энэ үгс надад хичнээн их эрхэм нандин болохыг та төсөөлөхгүй байх. Адамаар маш их бахархаж байна. Гэхдээ хэзээ ч нүүрэн дээр нь түүнийгээ хэлэхгүй л дээ” гэжээ.
“Яагаад хэлэхгүй гэж?” хэмээн сэтгүүлч лавлаж асуухад “Хэлж чадахгүй ээ. Тэгж ярилцаж сураагүй юм” гэсэн байна. Тэгэхэд нь сэтгүүлч “Тэгвэл таны үгийг Адам сонсоосой гэж хүсэж байна уу?” гэхэд Бувайсар Сайтиев “Маш их” хэмээн хэлсэн байна...
Эх сурвалж: SSS19 пэйж хуудас
Сэтгэгдэл (0)
Сэтгэгдэл бичигдээгүй байна