НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2026.01.19-2026.01.25/ өрнөсөн үйл явдлаас заримыг нь тоймлон хүргэж байна.
ЕРӨНХИЙ САЙД НАРЫГ COP17-Д ОРОЛЦОХЫГ УРЬЖЭЭ
Монгол Улсын Ерөнхий сайд Г.Занданшатар 2026 оны 1 дүгээр сарын 19–23-ны өдрүүдэд Швейцарын Холбооны Улсын Давос хотноо Дэлхийн эдийн засгийн 56 дугаар чуулга уулзалтад оролцох үеэрээ салбар хуралдаануудад үг хэлэхдээ манай улсад ирэх 8 дугаар сард болох COP17 бага хурлын талаар ярьжээ.
Мөн төр засгийн тэргүүнүүдийг тус хуралд оролцохыг урьсан байна. Тухайлбал, Бельгийн Хаант улсын Ерөнхий сайд Барт Де Вевертэй уулзалт хийж, НҮБ-ын Цөлжилттэй тэмцэх конвенцийн талуудын 17 дугаар бага хурал (COP17) болон зургаадугаар сард болох Монголын эдийн засгийн форумын талаар танилцуулж, Монгол Улсад айлчлахыг урьжээ.
Мөн Их Британийн Ерөнхий сайд асан Тони Блэйрийг Цөлжилттэй тэмцэх тухай НҮБ-ын Конвенцийн талуудын 17 дугаар бага хуралд оролцохыг урьсан байна.
ГАНД ТЭСВЭРЛЭХ БАЙДЛЫГ ОЛОН УЛСЫН ХЭМЖЭЭНД НЭМЭГДҮҮЛНЭ
Давосын Дэлхийн эдийн засгийн форумын үеэр дэлхий даяар уур амьсгалын өөрчлөлт, газрын гадаргын дулаарлаас улам эрчимжиж байгаа Гангийн асуудлаарх Олон улсын манлайлагч нарын уулзалт болжээ.
Жил бүр 55 сая хүний амьдрал гангаас хамааран эрсдэлд орж буй тул Монгол Улс Талуудын 17 дугаар бага хурлаар НҮБ-ын гишүүн орнуудыг хэлэлцээрийн зөвшилцөлд хүрэхээс гадна бусад оролцогч талуудын хамтын ажиллагааг эрчимжүүлэхэд манлайлан ажиллаж байгаагаа Байгаль орчин, уур амьсгалын өөрчлөлтийн дэд сайд Т.Мөнхтамир илэрхийлсэн байна.
Эдийн засгийн олон улсын зарим байгууллагуудын судалгаагаар жил бүр гангаас шалтгаалсан байгалийн гамшиг, усны хомсдол, хүнс, хөдөө аж ахуйн салбарын алдагдал 307 тэрбум ам долларт хүрч байгаа нь улс орнуудын хувьд хөгжлийн түвшнөөс үл хамааран “чимээгүй гамшиг”-д тооцогдож байна. Энэ агуулгаар эсрэг байр суурьтай төлөөллүүдийн дунд зөвшилцөл, итгэлцэлийг нэмэгдүүлэх нь Монгол Улсын нэр хүндийг нэмэгдүүлэхээс гадна Талуудын 17 дугаар бага хурлыг түүхэнд тэмдэглэн үлдээх бүх нийтийн эрмэлзэл болохыг өнөөдрийн арга хэмжээний оролцогч нар тэмдэглэжээ.
“COP”-УУДЫГ ДАРГАЛАГЧ УЛСУУДЫН ӨНДӨР ТҮВШНИЙ ХЭЛЭЛЦҮҮЛЭГТ ОРОЛЦОВ
Их Британийн Хааны “Кью” ботаникийн цэцэрлэгт хүрээлэнгээс Уур амьсгалын өөрчлөлттэй тэмцэх Парисын хэлэлцээрийн хэрэгжилтийн явцыг хэлэлцэх зорилгоор “2030 он хүртэлх замын зураглал” арга хэмжээг 1 дүгээр сарын 20-ны өдөр Лондон хотноо зохион байгуулав.
Тус арга хэмжээний үеэр энэ онд болох “3 СОР” буюу уур амьсгалын өөрчлөлт, биологийн төрөл зүйл, цөлжилтийн асуудлаарх НҮБ-ын гурван суурь конвенцын гишүүн орнуудын бага хурлуудыг даргалагч Монгол, Армени, Австрали улсуудыг оролцуулсан өндөр түвшний хэлэлцүүлэг болсон байна.
Тус хэлэлцүүлэгт Байгаль орчин, уур амьсгалын өөрчлөлтийн сайд Б.Батбаатар цахим мэндчилгээ дэвшүүлж, Монгол Улс цөлжилтийн асуудлаарх СОР17-г даргалах хүрээнд баримталж буй тэргүүлэх чиглэлүүдийг танилцуулжээ. Мөн СОР17-г Монголд зохион байгуулах Ажлын албаны зөвлөх А.Жавхлан панел хэлэлцүүлэгт цахимаар оролцож, оролцогчдын сонирхсон асуултанд хариулсан байна.
Уур амьсгалын өөрчлөлтийн асуудлаарх СОР нь жил бүр болдог бөгөөд биологийн төрөл зүйл, цөлжилтийн асуудлаарх СОР-ууд нь хоёр жилд нэг удаа болдог. Энэ жилийн хувьд гурван СОР давхцан болж буйгаараа онцлог бөгөөд Монгол Улс эдгээр СОР-уудын уялдаа холбоог хангах, чингэхдээ хамгийн чухал асуудал болсон “газар, бэлчээр”-ийн асуудалд олон улсын анхаарлыг хандуулахыг зорьж буй. Энэ ч үүднээс манай улс 2026 оныг “Бэлчээр ба нүүдлийн мал аж ахуй эрхлэгчдийн олон улсын жил” болгох НҮБ-ын тогтоолыг санаачлан батлуулсан юм.
БНХАУ-Д АЙЛЧЛАЛ ХИЙЖ, СOP17-ЫН ХҮРЭЭНД БҮХ ТҮВШИНД ХАМТРАН АЖИЛЛАХААР ЯРИЛЦЛАА
Байгаль орчин, уур амьсгалын өөрчлөлтийн сайд Б.Батбаатар тэргүүтэй төлөөлөгчид 2026 оны нэгдүгээр сарын 22-23-ны өдрүүдэд Бүгд Найрамдах Хятад Ард Улсад ажлын айлчлал хийлээ.
Энэ удаагийн ажлын айлчлал нь Монгол Улс 2026 онд зохион байгуулах Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ын бэлтгэл ажлыг хангах, уур амьсгалын өөрчлөлт, газрын доройтол, цөлжилттэй тэмцэх чиглэлээр олон улсын хамтын ажиллагааг өргөжүүлэх, санхүүжилт, хөрөнгө оруулалт, технологийн дэмжлэг татах зорилготой байв.
Айлчлалын үеэр холбогдох сайд нар, албаныхан болон төр хувийн хэвшлийн компаниудын төлөөллүүдтэй уулзалт хийж, хамтран ажиллахаар ярилцсан байна.
Монгол Улсын уур амьсгалын бодлого, олон улсын үүрэг амлалтын хэрэгжилтийг хангах, ногоон хөрөнгө оруулалт татах, бүс нутгийн хамтын ажиллагааг бэхжүүлэх зорилгоор Бээжинд Монгол Улсыг хавсран суугаа орнуудын Элчин сайдуудад Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ыг танилцуулах арга хэмжээг зохион байгуулжээ.
Сэтгэгдэл (0)
Сэтгэгдэл бичигдээгүй байна