НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2026.01.11-2026.01.18/ өрнөсөн үйл явдлаас заримыг нь тоймлон хүргэж байна.
ҮНДЭСНИЙ ХОРООНЫ 12 ДУГААР ХУРАЛДААН БОЛЛОО
Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг зохион байгуулах Үндэсний хорооны 12 дугаар хуралдаан нэгдүгээр сарын 12-ны өдөр Төрийн ордны “Их Засаг” танхимд боллоо.
Байгаль орчин, уур амьсгалын өөрчлөлтийн сайд, Үндэсний хорооны дарга Б.Батбаатар хуралдааныг удирдаж, Засгийн газрын 2025 оны 12 дугаар сарын 24-ний өдрийн 231 дүгээр тогтоолын хэрэгжилтийн хүрээнд COP17-ын Цэнхэр бүсэд хэрэгжүүлэх төсөл, арга хэмжээ, түр барилга байгууламжтай холбогдох асуудлаар хэлэлцлээ.
Олон улсын арга хэмжээ зохион байгуулсан туршлагатай байгууллагатай түрээсийн үйлчилгээний гэрээ байгуулах ажлыг холбогдох хууль, журмын дагуу зохион байгуулах ажлын хэсэг байгуулахаар шийдвэрлэсэн байна.
COP17 Зохион байгуулах Үндэсний хорооны 2026 оны ажлын ерөнхий төлөвлөгөөг батлуулах ажлын явцтай танилцаж, тулгамдсан асуудлуудыг хэлэлцжээ.
Үндэсний хорооны бүрэлдэхүүнийг шинэчлэхтэй холбогдуулан Дэд хороодын бүрэлдэхүүнд өөрчлөлт оруулах зэрэг асуудлаар үүрэг, чиглэл өгсөн байна.
СОР17 ДЭД ХОРООДЫН ХОЁРДУГААР ХУРАЛДААН БОЛОВ
Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг (COP17) зохион байгуулах Үндэсний хорооны Дэд хороодын хоёрдугаар хуралдаанд нийт 12 дэд хорооны дарга нар оролцов. Хуралдааны үеэр энэ онд хэрэгжүүлэхээр төлөвлөсөн ажлуудын явц, ойрын хугацаанд шийдвэрлэх шаардлагатай тулгамдсан асуудлууд, төсөв санхүүжилттэй холбоотой хэд хэдэн асуудлыг хэлэлцэж, санал солилцсон байна.
Дэд хороодын ажлын уялдаа холбоо, мэдээллийн солилцоог сайжруулах, тодорхой орны визний асуудалд онцгойлон анхаарах, зочид буудал, хоол, хүнсний хангамжийг олон улсын стандарт, шаардлагад нийцүүлэх, олон нийтэд зориулсан мэдээллийн ил тод байдал, түгээлт, сурталчилгааг идэвхжүүлэх зэрэг асуудлыг хуралдаанаар онцлон хэлэлцэж, тодорхой чиглэл, үүрэг даалгаврыг дэд хороодын дарга нарт өгчээ.
Мөн 2026 оны нарийвчилсан төлөвлөгөөг танилцуулах асуудлыг дараагийн хурлаар танилцуулж, хэлэлцэн батлах чиглэл өгсөн байна.
Сэтгэгдэл (0)
Сэтгэгдэл бичигдээгүй байна