ЭЛЭГНИЙ Д ВИРУСИЙН ЭМЧИЛГЭЭГ ЭХЛҮҮЛНЭ

Засгийн газрын өнөөдрийн /2024.03.27/ хуралдаанаас ЭМЯ-ны танилцуулсан элэгний Д вирусийн эмчилгээтэй холбоотой авч хэрэгжүүлж буй ажлыг дэмжиж, яаралтай хийх чиглэл өгсөн талаар Эрүүл мэндийн сайд С.Чинзориг мэдээлэл хийлээ.

С.Чинзориг "ОХУ-ын Эрүүл мэндийн яамны сайд Михаил Мурашкотой өнгөрсөн хоёрдугаар сард уулзах үеэрээ монгол иргэдийг Буриадад Д вирусийн эмчилгээнд хамруулах талаар хэлэлцээр хийсэн. Үүний үр дүнд Буриадын Эрүүл Мэндийн сайд нь манай улсын эмнэлгийн чиглэлээр үйл ажиллагаа явуулдаг хүмүүстэй уулзаж, иргэдийг Д вирусийн эмчилгээнд хамруулах санамж бичигт гарын үсэг зурсан. Сарын 160,000-170,000 рублийн үнэтэй эмчилгээг 135,000 болгохоор яригдаж байна. 

Мөн АНУ-ын "Hipatitis" компанитай Д вирусийн эмчилгээний бүтээгдэхүүн авахаар цахимаар уулзалт хийсэн. Европын холбооноос энэ эмийг хэрэглэхийг дэмжиж бүртгэсэн байдаг тул эмчилгээнд хэрэглэхээр судалж эхэлсэн. Европын холбоонд 12,000 еврогийн үнэтэй уг эмийг бид АНУ-ын эмийн үйлдвэртэй нь хэлэлцээр хийснээр үүнээс найм дахин хямдаар оруулж ирэхээр төлөвлөж байна. Дундын зуучлагч компанигүйгээр шууд үйлдвэрээс нь оруулж ирэхээр хэлэлцээр хийж байгаагаа Засгийн газарт өнөөдөр танилцуулсан. Засгийн газраас иргэдийн эрүүл мэндэд нэн хэрэгтэй тул дэмжлэг үзүүлж, уг ажлыг яаралтай хийх чиглэл өглөө.

АНУ-ын оруулж ирэх эмчилгээний зардлыг бууруулахын тулд гаалийн татвараас чөлөөлөх асуудал яригдаж байгаа. Энэ талаар Байнгын хороонд танилцуулна.

Засгийн газраас энэ жил "Элэг бүтэн Монгол" хөтөлбөрийн хүрээнд 7 тэрбум төгрөгийг улсын төсөвт баталж өгсөн. Мөн хөтөлбөрийн хүрээнд өнгөрсөн жил тусгасан төсвийн мөнгөнөөс  үлдсэн 6 тэрбумыг нэмээд 13 тэрбум төгрөгөөр Д вирусийн эмчилгээний зардлыг шийдэж энэ ондоо багтааж эхлүүлэхээр төлөвлөж байна.Гэхдээ бүх иргэдийг нэг дор эмчилгээнд хамруулах боломж одоогоор байхгүй. АНУ-аас нэг жил 1,000 тариа үйлдвэрлэж нийлүүлэх боломжтой гэсэн бол Буриадаас 700-1000 орчим тариа нийлүүлнэ гэж байгаа." хэмээн мэдээллээ.

Монгол Улсад гепатит вирусийн халдварын тархалт өндөр.  Халдвартай иргэдийн дунд элэгний хатуурал, хорт хавдраар өвчлөгсөд, үүний улмаас нас баралтын тоогоор дэлхийд дээгүүр орж байна. Тэр дундаа В, D вирусийн хавсарсан халдварын 80 хувь нь элэгний архаг үрэвсэл, хатуурал, хорт хавдраар хүндэрдэг байна.
Гепатитийн D вирусийн халдвар дангаар байдаггүй, В вирусийн халдвартай хүний таван хувь нь D вирусийн хавсарсан халдвартай гэж Дэлхийн эрүүл мэндийн байгууллага үздэг. Олон улсад хийдэг нэгдсэн аргачлалаар (мета-анализ) судалж үзэхэд, манай улсад гепатитийн D вирусийн халдвартай 66.000 хүн байж болзошгүй гэсэн тооцоолол гарчээ.