Зүүн Азийн залуучуудын шатрын аварга шалгаруулах тэмцээний эрэгтэй ангилалд AB chess шатрын клубийн тамирчин Х.Өлзийхишиг түрүүлж, эх орныхоо төрийн далбааг мандуулж, Олон улсын мастер /IM/ цолтон болжээ. Тэрбээр мөн шатрын ноён оргил цол ‘Grand Master’ цолны 1 норм биелүүлсэн байна.
Гэгээн Арвай клубийн тамирчин Б.Энхсаран эмэгтэй ангилалд Зүүн Азийн залуучуудын дэд аварга болж, Олон улсын шатрын холбооны Мастер /WFM/ цолны болзол хангасан байна.
Мөн тэмцээнээс Монголын Ирээдүй шатрын клубийн тамирчин, Олон улсын шатрын холбооны мастер Н.Содбилэгт хүрэл медаль хүртжээ.
‘Hong Kong International Chess Open’ тэмцээнд Гэгээн Арвай шатрын клубийн тамирчин, Олон улсын мастер /IM/ Г.Амартүвшин ‘Masters’ ангилалд түрүүлж, эх орныхоо төрийн далбааг мандуулж, 50,000 хонгконг доллараар шагнуулсан байна.
Мөн тэмцээний Masters ангилалд эрэгтэйчүүдтэй, өөрөөсөө өндөр ур чадвартай, дэлхийн шилдэг тамирчидтай өрсөлдсөн Стейниц академийн тамирчин Олон улсын шатрын холбооны дэд мастер З.Нарансолонго чансаагаа 108-аар нэмэгдүүлж, 2090 хүргэснээр Олон улсын шатрын холбооны мастер цол хүртэхэд ойрхон болжээ.
Манай залуу шатарчид Үндэсний эрх чөлөө, тусгаар тогтнолоо сэргээсний 114 жилийн ойгоор ийнхүү бахдам амжилт үзүүлж, эх орныхоо төрийн далбааг мандуулж, төрийн дууллаа эгшиглүүлжээ.
Сэтгэгдэл (0)
Сэтгэгдэл бичигдээгүй байна