ДЭЭД ШҮҮХИЙН ЕРӨНХИЙ ШҮҮГЧ, ШЕЗ-ИЙН ДАРГА АСАН С.БАТДЭЛГЭР СҮХБААТАРЫН ОДОН ХҮРТЖЭЭ

Монгол Улсын Ерөнхийлөгч Ухнаагийн Хүрэлсүхийн зарлиг гаргаж, Дээд шүүхийн Ерөнхий шүүгч, Шүүхийн ерөнхий зөвлөлийн дарга асан, Гавьяат хуульч Содномдаржаагийн Батдэлгэрт төрийн дээд шагнал "Сүхбаатарын одон" хүртээжээ. 

Улсын дээд шүүхийн Эрүүгийн хэргийн танхимын шүүгчид төрийн дээд одонгоор шагнагдсан С.Батдэлгэр шүүгчид баяр хүргэж, хүндэтгэл үзүүлсэн байна. 

С.Батдэлгэр нь 1987 онд МУИС-ийн хуулийн анги төгсөөд Эрдэнэт хотын шүүхийн гуравдугаар хэсгийн Ардын шүүхэд дадлагажигч, шүүгчээр ажлын гараагаа эхэлж, Октябрийн район, Баянгол дүүргийн шүүхийн шүүгч, Нийслэлийн шүүхийн шүүгч, Ерөнхий шүүгч, Улсын дээд шүүхийн шүүгч, Ерөнхий шүүгч, Шүүхийн ерөнхий зөвлөлийн дарга зэрэг албыг хашиж, нийт 37 жил шүүхийн системд ажилласан юм. 

Тэрбээр Нийслэлийн шүүхийн Ерөнхий шүүгч, Улсын Дээд шүүхийн Ерөнхий шүүгч, Шүүхийн Ерөнхий зөвлөлийн дарга зэрэг хариуцлагатай албанд ажиллаж байхдаа шүүхийн хараат бус байдлыг бэхжүүлэх, шүүгч ажилтны нийгмийн асуудлыг шийдвэрлэх, шүүхийн шинэтгэлийг эрчимжүүлэх, шүүхийн ил тод нээлттэй байдлыг хангах чиглэлд олон ажлыг төлөвлөн амжилттай хэрэгжүүлсэн билээ. 

С.Батдэлгэрийг 2016 онд Монгол Улсад орчин  орчин цагийн шүүх байгуулагдсаны 105, Улсын Дээд шүүх байгуулагдсаны 90 жилийн ойг тохиолдуулан Монгол Улсын Гавьяат хуульч цолоор шагнасан юм.