Пара бочигийн Үндэсний шигшээ багийн тамирчин, спортын мастер Т.Мөнхдэмбэрэл Австрали улсын Канберра хотноо 2025 оны 11 дүгээр сарын 4-10ны өдрүүдэд болсон "World Boccia Challenger 2025" олон улсын тэмцээнээс мөнгөн медаль хүртэж, бахдам амжилт үзүүллээ.
Энэхүү тэмцээнийг Дэлхийн Боччагийн холбоо зохион байгуулдаг бөгөөд 25 гаруй улс орны 100 гаруй шилдэг пара тамирчин BC1–BC4 ангиллаар өрсөлддөг хэмээх нэр хүндтэй уралдаан юм. “World Boccia Challenger” цуврал нь 2028 оны Лос Анжелесийн Паралимпийн наадамд оролцох эрхийн оноо цуглуулах чухал тэмцээнүүдийн нэг юм.
Спортын мастер Т.Мөнхдэмбэрэл тэмцээний туршид өндөр төвшний ур чадвар, нарийн мэдрэмж, тууштай тоглолтоороо олон улсын шүүгч, үзэгчдийн анхаарлыг татсан байна. Урьдчилсан шатанд дараалан ялалт байгуулсны дараа тэрбээр өөрийн ангиллын финалын тоглолтод шалгарч, төгсгөлд нь мөнгөн медаль хүртжээ.
Энэ амжилт нь Монгол Улсын пара спортын түүхэнд боччагийн төрлөөр гарсан хамгийн том амжилтуудын нэг болж, манай баг тамирчдын дэлхийн тавцанд өрсөлдөх чадамж, ур чадвар өсөн нэмэгдэж буйг илтгэж байна.
Шигшээ багийн дасгалжуулагчид тэмцээний дараа сэтгэгдэл хуваалцахдаа “Манай тамирчид олон улсын түвшинд тогтвортой өрсөлдөж эхэлж байгаа нь бахархалтай. Ийм төрлийн чансаа өндөр тэмцээнүүдэд оролцох нь туршлага, ур чадварыг нэмэгдүүлж, 2028 оны Паралимпийн бэлтгэлд үнэтэй хувь нэмэр оруулж байна” хэмээн онцолжээ.
Сэтгэгдэл (0)
Сэтгэгдэл бичигдээгүй байна