ОЙ ТОГТООЛТЫН ОЛОН УЛСЫН ТЭМЦЭЭНЭЭС 18 АЛТ, 20 МӨНГӨ, 17 ХҮРЭЛ МЕДАЛЬ ХҮРТЭЖ, ҮНЭМЛЭХҮЙ ЯЛАЛТ БАЙГУУЛЛАА

Филиппин улсын Манилла хотод 2025 оны есдүгээр сарын 20-ны өдөр болсон Ой тогтоолтын олон улсын нээлттэй тэмцээнд манай баг тамирчид нийт 60 медалиас 18 алт, 20 мөнгө, 17 хүрэл буюу нийт 55 медаль хүртэн багаараа үнэмлэхүй ялалтыг авлаа.

Энэтхэг, Филиппин, Индонези, Австрали зэрэг таван орны 68 шилдэг тамирчид оюун ухаанаа сорин өрсөлдсөн тус тэмцээнд манай улсыг төлөөлөн 21 тамирчин Олон улсын шүүгч, дасгалжуулагч Б.Баасандорж, Ө.Сэнгэсамдан, туслах дасгалжуулагч Б.Батдаваа нарын хамт оролцсон юм. 

Багийн төрөлд манай тамирчид 16122 оноо цуглуулан “АВАРГА БАГ” болсон байна. 

Ганцаарчилсан төрөлд тэмцээний 10 төрлийн дараах дүнгээр:

Бага насны ангилалд: 

• Г.Сондор -Алтан медаль, цом 
• Г.Сийлэн- Мөнгөн медаль 
• Х.Анирлан- Хүрэл медаль 

Өсвөр насны ангилалд 

• Г.Эрдэнэгэрэл-Алтан медаль, цом 
• Ч.Болормаа- Мөнгөн медаль 
• М.Гэгээн-Оюун- Хүрэл медаль тус тус хүртжээ. 

Мөн Ч.Болормаа 5 минутын "Зураг" төрөлд 468 зураг цээжлэн, алдаагүй санаж, Өсвөр насны дэлхийн рекордыг тогтоосон байна.

Ийнхүү Монголын Оюун ухааны академийн тамирчид Америк, Англи, Герман, Турк, Хятад, Хонг Конг, Сингапур, Австри, Индонез, Япон, Солонгос, Швед, Энэтхэг зэрэг 20 гаруй улсад болсон цээж бодолт, хурдан уншлага, ой тогтоолтын олон улсын 75 дахь тэмцээндээ амжилттай оролцон нийт 153 цом, 662 медаль  хүртэж дэлхийн олон дээд амжилтыг шинэчлэн тогтоож амжилтын буухиагаа үргэлжлүүлж байна.