Аугаа их Эх орны дайны ялалтын 80 жилийн ойн хүрээнд Оросын соёл шинжлэх ухааны төвд Буриад Улсын Засгийн газар, Соёлын яамны дэмжлэгээр бүтээн туурвисан “Фронт Цэгмид-Эв найрамдлын бэлгэ тэмдэг” баримтат киноны нээлт болжээ.
Мөн энэ үеэр Монгол цэргийн музей, Г.К.Жуковын музей, РЦНК болон “Мөрдэстэй цуглуулагч” төрийн бус байгууллагаас эрхлэн гаргасан тус тусын онцлогтой гурван ч хэсэг үзмэр дэлгэгдсэн байв.
Хүндэтгэлийн үйл ажиллагааны хүндэт зочид нь монголчуудынхаа сэтгэлийн бэлэг, тусламжийг фронтод хүргэлцэж явсан Дундговь аймгийн Сайхан-Овоо сумын харьяат ахмад дайчин, улсын сайн малчин С.Цэгмид болон Халхын голын байлдаанд оролцсон “Баяндунгийн 16 охин”-ы нэг ахмад дайчин Ц.Чимэдцэрэн нар байжээ. Зуу гаруй насыг зооглосон ахмадууд маань шинэхэн киноны нээлтэд хүрэлцэн ирсэн үзэгчдэд мэндчилгээ дэвшүүлж, дурсгалын зураг авахуулсан байна.
Уран зургийн үзэсгэлэн, баримтат киноны нээлтэд Батлан хамгаалах сайдын зөвлөх Д.Эрдэнэбат, ЗХЖШ-ын орлогч дарга бригадын генерал Б.Баатар, Батлан хамгаалахын ерөнхий хянан шалгагч бригадын генерал Ж.Болдбаатар, Дайн, Энхийг дэмжих ажиллагаанд оролцогчдын хорооны тэргүүн бэлтгэл хошууч генерал Б.Баярмагнай нар оролцож, ахмад дайчдад гүн хүндэтгэл үзүүлжээ.
Монгол түмнээс Зөвлөлтийн ард түмэн, Улаан армид зориулсан тусламжийн цувааг хүргэлцэж өгсөн 19-хөн настай эгэл малчин эмэгтэй амьдрал, дурсамжаар дамжуулан Монгол Улсын хойд хөршдөө үзүүлсэн тусламж дэмжлэг, “Бүхнийг фронтод, бүхнийг ялалтын төлөө” гэсэн уриан дор ажиллаж амьдарч байсан чин сэтгэлийг харуулахыг хичээсэн талаараа уг баримтат киног бүтээсэн Буриад Улсын нэрт найруулагч Олег Юмов өгүүлсэн юм.
Сэтгэгдэл (0)
Сэтгэгдэл бичигдээгүй байна