Монголын шатрын холбоо Дэлхийн цомын тэмцээнд оролцох эрх олгох Азийн 3.3 бүсийн аварга шалгаруулах тэмцээнийг Азийн шатрын холбоотой хамтран 2025 оны 4-р сарын 22-ны өдрөөс 5-р сарын 2-ны өдрүүдэд Улаанбаатар хотноо зохион байгуулж байна.
Тэмцээнд Монгол, Филиппин, Сингапур, Хонконг, Вьетнам, Малайз, Индонез гэсэн Ази тивийн шилдэг 7 орны шатарчид оролцож байгаа юм.
Тэмцээний нээлтийн ёслолын үйл ажиллагааны үеэр Азийн 3.3 бүсийн ерөнхийлөгч Адианто Утут хэлсэн үгэндээ "Ази тивд манай 3.3 бүсэд Зүүн Тимороос эхлээд Япон хүртэл 17-н улс багтдаг бөгөөд нийт 700-н сая хүн амтай гэж хэлж болно. Иймд бид олуулаа Ази тивдээ хамгийн хүчирхэг шатрын бүс болох боломжтойг бидний өсвөр үе, залуучууд болон ахмад шатарчдын сүүлийн жилүүдэд гаргаж буй амжилт нотолж байна. Дэлхийн цомын тэмцээний эрх олгох Ази тивдээ нэр хүндтэй уг тэмцээнийг эх орондоо хүлээн авч хариуцлагатайгаар зохион байгуулж буй Монгол Улсад чин сэтгэлийн халуун баяр хүргэж байна" гэжээ.
Хоёр жилд нэг удаа зохион байгуулагддаг Азийн бүсийн тэмцээний нээлттэй ангилалд эхний 2 байрт, эмэгтэй ангилалд түрүүлсэн шатарчид 2025 оны ФИДЕ Дэлхийн цомын тэмцээнд оролцох эрх авдаг нэр хүндтэй тэмцээн гэдгээрээ онцлогтой.
Манай улсаас нээлттэй ангилалд 42, эмэгтэй ангилалд 48 шатарчид оролцож байгаа бол гадаад улсаас 21 шатарчин оюун ухаанаа сорин өрсөлдөж байна.
Сэтгэгдэл (0)
Сэтгэгдэл бичигдээгүй байна