НҮБ-ын төв штабын энхийн ажиллагааны газраас НҮБ-ын энхийг сахиулах ажиллагаанд оролцож буй цэрэг хандивлагч орнуудын цэргийн багуудын үүрэг гүйцэтгэх бэлэн байдлыг шалгаж үнэлэх зааврыг шинэчлэн тогтоосон юм.
Тэгвэл НҮБ-ын төв штаб болон "UNMISS" энхийг сахиулах ажиллагааны хүчний командлагчийн санал болгосны үндсэн дээр уг шинэчлэгдсэн зааварт тодотгол хийх, газар оронд дээр хэрэгжиж буй нөхцөлд нь үнэлэлт өгөх зорилгоор БНӨСУ-д явагдаж буй НҮБ-ын мандаттай "UNMISS" энхийг сахиулах ажиллагаанд үүрэг гүйцэтгэж буй Монгол Улсын Зэвсэгт хүчний XIV ээлжийн мотобуудлагын батальоныг сонгож, НҮБ-ын төв штаб, “UNMISS” ажиллагааны хүчний командлал, Юнити секторын командлалын 3 ажлын хэсэг манай цэргийн багийн бэлэн байдлыг шалгалаа.
НҮБ-ын төв штабаас Япон улсын хурандаа Атуши Томинагагаар ахлуулсан бүлэг, "UNMISS" энхийг сахиулах ажиллагааны Хяналт, шинжилгээ, үнэлгээний газраас хурандаа Такаши Кобаяашигаар ахлуулсан бүлэг, Юнити сектороос тус секторын штабын дарга дэд хурандаа Вивек Сахена Рахулаар ахлуулсан холбогдох албаны бүрэлдэхүүн энэ сарын 18-ны өдөр Бэнтью суурин дахь "Хубилай" баазад, 19-ний өдөр Парианг сууринд бие даан үүрэг гүйцэтгэж буй мотобуудлагын батальоны ІІ рот буюу "Арвай" баазад ажиллаж, цэргийн багийн үндсэн үүрэг гүйцэтгэлт, бэлэн байдалд үнэлгээ хийж бие бүрэлдэхүүний ажиллагааны газар оронд мандатаар заасан үүргийн хэрэгжилт, үйл ажиллагааг шалгаж, үнэлгээ дүгнэлт өгсөн байна.
Тус шалгалтаар мотобуудлагын батальоны салбаруудыг үүсэж болох цагийн байдалд авах арга хэмжээг тактик жагсаалын хэлбэрээр шалгасан бол штабын тасгуудыг НҮБ-ын энхийг сахиулах ажиллагаанд цэргийн багуудын хөтлөгдөх баримт бичгүүдийн боловсруулалт, хөтлөлт, амаар болон бичгээр илтгэж буй байдалд үнэлгээ өгсөн бөгөөд манай энхийг сахиулагчид амжилттай шалгуулжээ.
Эх сурвалж: Зэвсэгт хүчний жанжин штаб
Сэтгэгдэл (0)
Сэтгэгдэл бичигдээгүй байна