Зэвсэгт хүчний 167 дугаар анги “Эх оронч монгол-Их сэргэлтийн жил”-тэй уялдуулан Зэвсэгт хүчин болон ангийн үйл ажиллагааг сурталчлах, хүүхэд, залуучуудад цэрэг-эх оронч үзлийг түгээн дэлгэрүүлэх зорилгоор Өмнөговь аймгийн Политехникийн коллеж, Ерөнхий боловсролын сургуулийн ахлах ангийн сурагчдад зориулсан “Цэрэг-эх оронч” сэдэвт сургалт, сурталчилгааны ажлыг энэ сарын 12, 13-ны өдрүүдэд амжилттай зохион байгуулжээ.
Сурталчилгааны ажлын хүрээнд эх орноо хайрлах, хамгаалах үзэл санааг төлөвшүүлэх, Зэвсэгт хүчний үүрэг, ач холбогдлыг танилцуулах, мөн залуучуудын цэрэг-эх оронч хүмүүжил, хариуцлагатай иргэн байх ойлголтыг гүнзгийрүүлэхэд чиглэсэн харилцан яриа, үзүүлэх сургалтуудыг зохион байгуулсан юм.
Тус үйл ажиллагаанд мотобуудлагын батальоны захирагчийн нэгдүгээр орлогч, штабын дарга ахмад Э.Эрболд, ажиллагааны ахлагч сургагч ахлагч Э.Эрдэнэцогт нараар ахлуулсан бүрэлдэхүүн оролцож, сурагчдад Монгол Улсын батлан хамгаалах бодлого, Зэвсэгт хүчний өнөөгийн хөгжил, эх орноо хамгаалахад залуусын оролцоо ямар чухал болох талаар мэдээлэл өгч, өөрсдийн туршлагаасаа хуваалцсан байна.
Сурагчдын сонирхлыг татсан энэхүү сургалт, сурталчилгааны ажлаар дамжуулан тэд эх оронч үзэл, хариуцлагатай иргэн байх ёс зүйн талаарх ойлголттой болж, ирээдүйд эх орныхоо хөгжил, аюулгүй байдлын төлөө хувь нэмрээ оруулах урам зориг авч чадсан юм.
Эх сурвалж: Зэвсэгт хүчний жанжин штаб
Сэтгэгдэл (0)
Сэтгэгдэл бичигдээгүй байна