Аж үйлдвэр, эрдэс баялгийн сайд Ц.Туваан тэргүүтэй төр засгийн болон уул уурхайн салбарын төлөөллүүд Канадын Торонто хотод болж буй PDAC буюу дэлхийн уул уурхайн олон улсын чуулга уулзалтад оролцож байна.
1932 оноос эхлэн 93 дахь жилдээ зохион байгуулагдаж байгаа уг чуулга уулзалт энэ удаад дөрвөн өдрийн турш үргэлжлэх бөгөөд Монгол Улс уул уурхайн салбарын хөрөнгө оруулалтын шинэ боломж гарцыг танилцуулах, шинэ түншлэлийг судлах, хамтын ажиллагаагаа өргөжүүлэх яриа хэлцлүүдийг өрнүүлэх юм.
Олон улсад оролцогчдын цар хүрээ, нэр хүнд, нөлөөллөөрөө хамгийн томд тооцогдох энэхүү чуулга уулзалтад дэлхийн 135 орны 30 мянга орчим төлөөлөгч оролцож, 1100 үзэсгэлэнгийн талбай ажиллаж, 700 орчим салбарын мэргэжилтэн, экспертүүд илтгэл тавьж, хэлэлцүүлэг хийж байна.
Аж үйлдвэр, эрдэс баялгийн яам болон Монголын Уул Уурхайн Үндэсний Ассоциаци (МУУҮА) хувийн хэвшлийн төлөөллүүд хамтран Монголын үзэсгэлэнгийн талбайг ажиллуулж, Монгол Улсын эрдэс баялгийн салбарын томоохон төсөл, боломжуудыг дэлхийн хөрөнгө оруулагчдад танилцуулж байгаа юм.
Чуулга уулзалтын үеэр Аж үйлдвэр, эрдэс баялгийн сайд Ц.Туваан зарим улс орнуудын төр засгийн төлөөллүүд, салбарын сайд нартай тусгайлан уулзалтууд хийж, хамтын ажиллагааны талаар санал солилцож байна. Мөн энэ үеэр олон улсын уул уурхайн сайд нарын уулзалт зохион байгуулагдана.
Түүнчлэн “Монголын өдөр” арга хэмжээг зохион байгуулах юм.
Сэтгэгдэл (0)
Сэтгэгдэл бичигдээгүй байна