Ч.ӨНӨРБАЯР: ЭРСДЭЛИЙН УДИРДЛАГА БОЛ ХАРИУЦЛАГАТАЙ ЗАСАГЛАЛЫН НЭГЭН ШАЛГУУР ҮЗҮҮЛЭЛТ, ҮНЭЛЭМЖ ЮМ

Засгийн газрын хяналт хэрэгжүүлэх газрын дарга Ч.Өнөрбаяр яам, агентлагууд, төрийн өмчит үйлдвэрийн газрууд, олон улсын болон судалгаа шинжилгээний байгууллагууд, хувийн хэвшлийн нийт 130 гаруй төлөөлөгч оролцсон “Эрсдэлийн удирдлагыг төрийн байгууллагад хэрэгжүүлэх нь” сэдэвт хэлэлцүүлгийг хааж, үг хэлсэн юм. 

Ч.Өнөрбаяр "Аливаа бодлого, шийдвэр, зохицуулалтыг төлөвлөх, хэрэгжүүлэхэд тухайн үйл ажиллагаанд оролцогч талуудын оролцоог хангах, тухайн асуудлын хүрээнд боломжит хэмжээнд олон талын төлөөллийн байр суурь, санал бодлыг сонсох, хэлэлцэх шаардлагатай байдаг.

Ингэснээр тухайн бодлого, шийдвэр нь онол төдийгүй практик хэрэгцээ шаардлагад нийцсэн, талуудын оролцоо, хамтын ажиллагааг дэмжсэн, бодит, хэрэгжих боломж, магадлал бүхий шийдвэр болдог.

Энэ утгаараа эрсдэлийн удирдлагыг хэрэгжүүлэх нэгдсэн тогтолцоог хэрхэн бүрдүүлэх вэ гэдгийг засаглалын түвшинд авч үзэх, эрсдэлийн удирдлагыг тухайн байгууллагын үйл ажиллагаанд хэрхэн шигтгэх вэ, байгууллагын үндсэн үйл ажиллагааны нэгэн хэсэг хэрхэн болгох вэ, эрсдэлийн удирдлагын дадал хэвшил, соёлыг хэрхэн бий болгох вэ гэдгийг байгууллагын түвшинд олон талаас харж, сэтгэж, хэлэлцэх боломжийг олгосон өнөөдрийн хэлэлцүүлэг үр дүнтэй, өгөөжтэй арга хэмжээ боллоо гэж боллоо хэмээн онцлов.

Өнөөдрийн хэлэлцүүлгээр бид зөвхөн нэг талаас мэдлэг, мэдээлэл олгох бус асуудлыг олон талаас хэлэлцэн харилцан суралцаж, хамтран ажиллалаа.

Эрсдэлийн удирдлага бол хариуцлагатай засаглалын нэгэн шалгуур үзүүлэлт, үнэлэмж юм. Энэхүү тогтолцоог бэхжүүлэхэд бидний өнөөдрийн хэлэлцсэн, суралцсан, хамтран ажилласан явдал чухал ач холбогдолтой юм.

Ялангуяа “Төрийн байгууллагад эрсдэлийн удирдлагыг хэрэгжүүлэх бодлого”, түүнийг хэрэгжүүлэх заавар зэрэг баримт бичгүүдэд та бүхний санал, зөвлөгөө, шүүмжийг тусган сайжруулан боловсруулах болно.

Хэлэлцүүлэгт оролцсон та бүхэнд, баялаг мэдээлэлтэй, сонирхолтой илтгэл бэлтгэн оролцсон хүндэт зочдодоо тухайлбал Сангийн яам, Үндэсний аудитын газар, “Эрдэнэс монгол” ХХК, “Эрдэнэт үйлдвэр” төрийн өмчит үйлдвэрийн газар, Худалдаа хөгжлийн банкны төлөөлөл, хүндэт зочдодоо талархал илэрхийлье.

Мөн панелистаар оролцсон Хууль зүй, дотоод хэргийн яам, Үндэсний статистикийн хороо, Онцгой байдлын ерөнхий газар, Гаалийн ерөнхий газар, Монголын ипотекийн корпораци, Нэгдсэн үндэстний байгууллагын хөгжлийн хөтөлбөр зэрэг байгууллагуудын төлөөлөл, хүндэт зочид та бүхэнд талархал илэрхийлье.

Илтгэл танилцуулсан, панелистаар оролцсон эдгээр байгууллагын эрсдэлийн удирдлагын туршлага, сургамж нь төрийн байгууллагуудад эрсдэлийн удирдлагын тогтолцоог бэхжүүлэхэд жишээ болон түүчээлнэ гэдэгт итгэлтэй байна" гээд цаашдын хамтын ажиллагаа, ажил үйлсэд нь амжилт хүссэн байна.