ӨРГӨДӨЛ, ГОМДЛЫН ШИЙДВЭРЛЭЛТЭД ИРГЭДИЙН СЭТГЭЛ ХАНАМЖ ДУНДЖААР 24 ХУВЬТАЙ БАЙНА

Засгийн газрын хяналт хэрэгжүүлэх газраас иргэдээс төрийн байгууллага, албан тушаалтанд ирүүлсэн өргөдөл, гомдлыг шийдвэрлэлтийн тайлан мэдээ боловсруулах арга зүйн цахим уулзалт хэлэлцүүлгийг зохион байгуулжээ.

Уулзалт хэлэлцүүлэг нь орон даяар буюу 21 аймаг 340 сум, төрийн байгууллагуудын төлөөлөл болох 500 гаруй албан хаагчид оролцсон анхны цахим уулзалт хэлэлцүүлэг болсон байна. 

Засгийн газрын Хяналт хэрэгжүүлэх газрын дарга Ч.Өнөрбаяр Засгийн газрын Хяналтын тухай хуульд заасан захиргааны байгууллагын үйл ажиллагаанд хууль ёсыг сахиулах, сахилга, хариуцлагыг дээшлүүлэх, бүтээмжийг нэмэгдүүлэх, хууль тогтоомжийн хэрэгжилтийг хянах, Засгийн газраас харьяа байгууллага, албан тушаалтанд хяналт тавих тогтолцоог бүрдүүлэх чиг үүргийг тус байгууллага эрхэлж буйг онцолжээ.  

Тус газрын Тандалт судалгааны багаас хагас жил, жилийн эцэст байгууллага, албан тушаалтны үйл ажиллагаанд хүн, хуулийн этгээдээс ирүүлсэн өргөдөл, гомдол, мэдээлэл, хэрэглэгчийн үнэлгээний судалгаа зэргийг үндэслэн тандалт судалгаа, өргөдөл, гомдлын шийдвэрлэлтийн тайлан мэдээнд үндэслэн дүн шинжилгээ хийсэн байна. Улсын хэмжээнд жилд давхардсан тоогоор 530 мянга орчим өргөдөл гомдол ирдэг, өргөдөл, гомдлын шийдвэрлэлтийн байдал нь 90-ээс дээш хувьтай байдаг боловч бодит байдал дээр чанарын үзүүлэлт муу, төрд итгэх иргэдийн итгэл иргэдийн төрөөс авч байгаа үйлчилгээ нь сэтгэл ханамжийн хувьд хангалтгүй байгаа аж.

Тандалт судалгааны баг санамсаргүй түүврээр тандалт судалгаа хийж үзэхэд өргөдөл, гомдлын шийдвэрлэлтэд иргэдийн сэтгэл ханамж дунджаар 24 хувьтай байгаа бөгөөд шийдвэрлэлтийн хувь болон бодит шийдвэрлэлтэд өгч буй иргэдийн сэтгэл ханамж зөрүүтэй хэвээр байна.

Иймд иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх, төрийн үйлчилгээний чанар хүртээмжийг дээшлүүлэх, иргэдийн сэтгэл ханамжийг нэмэгдүүлэх, өргөдөл, гомдлыг бүртгэх, ангилах, өргөдөл, гомдлын агуулгад дүн шинжилгээ хийх, төрийн үйлчилгээний чанар хүртээмжийг дээшлүүлэх, түргэн шуурхай хүнд сурталгүй болгох чиглэлээр тодорхой арга хэмжээ авч, хэрэгжүүлэхэд анхаарч, төрийн алба хаагчдын саналыг тусган хамтран ажиллах болно гэж Ч.Өнөрбаяр дарга мэдэгджээ.