Итали улсын Молвено хотод 2025 оны нэгдүгээр сарын 13-18-ны өдрүүдэд болж буй Мөстэй усанд сэлэлтийн дэлхийн аварга шалгаруулах тэмцээнээс Баянгол дүүргийн усан спорт сургалтын төвийн тамирчин С.Мөнх-Оргил, М.Цэнгүүн 50 м зайнд мэлхий сэлэлтийн төрлөөр тус бүр хүрэл медаль хүртжээ.Тэмцээний үед усны хэм 1 байсан аж.
Дэлхийн 48 улсын 752 тамирчин өрсөлдөж буй уг тэмцээнд Монгол улсаа төлөөлөн Баянгол дүүргийн усан спорт сургалтын төвийн багш Ш.Даваадорж, тамирчин М.Цэнгүүн, С.Мөнх-Оргил нар оролцож байгаа юм.
Дашрамд дурдахад Баянгол дүүргийн Баянгол клубын тамирчид нь 2015 оноос эхлэн Мөстэй болон Өвлийн усанд сэлэлтийн Дэлхийн аварга, Дэлхийн цом, Олон улсын 100 гаруй тэмцээнд оролцож 200 гаруй медаль хүртсэн байдаг.
Тухайлбал, энэ удаад тэмцээнд оролцож буй тамирчдын зарим амжилтаас дурдвал, багш Ш.Даваадорж нь 2019 оны дэлхийн чансааны нэгд бичигдэж, цом, алтан медаль хүртэж байсан бол М.Цэнгүүн 2022 онд өвлийн усанд сэлэлтийн Дэлхийн аварга болж, С.Мөнх-Оргил 2024 онд өвлийн усанд сэлэлтийн Дэлхийн аварга шалгаруулах тэмцээнээс хос мөнгөн медаль хүртэж байсан.
Сэтгэгдэл (0)
Сэтгэгдэл бичигдээгүй байна