Зам тээврийн яамны Төрийн нарийн бичгийн дарга С.Батболд тэргүүтэй албаныхан Япон улс руу машины эд анги экспортлогч “Моншибасаки” ХХК-ийн үйл ажиллагаатай өчигдөр /2024.11.13/ танилцжээ.
Одоогоос хорин жилийн өмнө буюу 2005 онд байгуулагдсан тус компани нь автомашины эд ангийг өндөр нарийвчлалтай зорж боловсруулан экспортолсоор иржээ. Өнөөдрийн байдлаар суудлын болон ачааны автомашины тормос, жолооны хүрд, суудал, хөдөлгүүр, жижиг эд анги гэх мэт нийтдээ 74 нэр төрлийн бүтээгдэхүүн үйлдвэрлэж байгаа аж. Жишээлбэл, 2021 онд 2 сая 701 мянга 250 ширхэг бүтээгдэхүүнийг Японы зах зээлд нийлүүлжээ.
Уулзалтын үеэр Төрийн нарийн бичгийн дарга С.Батболд Япон улсын стандартад нийцсэн бүтээгдэхүүн үйлдвэрлэн борлуулах нь маш том сорилт гээд “Үйлдвэрлэлийн аутсорсингийг хөгжүүлж, Ази тив рүү чиглэж буй автомашины үйлдвэрлэлийг ашиглах боломж бидэнд бий. Цаашид тээвэр, ложистикийн асуудлыг бид анхааралдаа авч, ажиллах болно” гэсэн байна.
“Моншибасаки” ХХК-ийн захирал Д.Долгормаа “Манайх Японоос бэлдцээ импортлон авч эх орондоо япон техник, технологи, тоног төхөөрөмжөөр автомашины эд ангийг боловсруулж, эргээд Япон руу 100 хувь экспортолдог. Гэвч бүтээгдэхүүнээ хугацаандаа нийлүүлж амждаггүй, ингэснээр боломж болон цаг хугацаа алддаг. Бид тээвэрлэлтэд дор хаяж 4-6 сар зарцуулдаг. Гол шалтгаан нь манай улс Японоос хол, хоёр том хөршийн дунд байрладаг газар зүйн байршил, далайд гарцгүй тээвэрлэлтийн байдлаас болж уддаг нь нөлөөлж байна” гэжээ.
Сэтгэгдэл (0)
Сэтгэгдэл бичигдээгүй байна