Дэлхийн аварга шалгаруулах тэмцээнээс таван медаль хүртсэн Монгол Улсын анхны тамирчин болох “Алтан охин” Мөнхжанцангийн Анхцэцэг их спортоос зодог тайлж буйгаа мэдэгджээ.
М.Анхцэцэг хүндийг өргөлтийн спортоор 10 настайгаасаа эхлэн 17 жилийн турш хичээллэсэн бөгөөд 12 настайдаа Ерөнхийлөгчийн нэрэмжит тэмцээнээс хүрэл медаль хүртэн, анхны амжилтаа гаргасан юм. Тэрбээр 13 настайдаа Олон улсын хэмжээний мастер цол хүртсэн бөгөөд улсынхаа дээд амжилтыг олон арван удаа шинэчлэн тогтоосон билээ.
16 насандаа Өсвөрийн Азийн аварга шалгаруулах тэмцээнээс мөнгөн медаль хүртсэн нь олон улсын тэмцээний анхны шагнал нь байсан бөгөөд Залуучуудын дэлхийн аварга, Оюутны дэлхийн аварга, Азийн аварга, Дэлхийн аварга гээд олон цолыг эх орондоо авчирсан анхдагч юм.
Арван хэдхэн настайдаа олонд танигдсан Мөнхжанцангийн Анхцэцэгийг Монголын ард түмэн “Алтан охин” хэмээн хайрлан дээдэлдэг.
М.Анхцэцэг зодог тайлах тухайгаа “Ар гэрээ анхаарч, нөхрөө дэмжинэ. Би аав, ээжтэйгээ хүүхэд байхдаа нэг ч удаа зугаалгад явж үзээгүй. Гоё амьдарч үзмээр санагдаж байгаа.” гэж ярьсан байна.
Мөн 17 жилийн турш хүндийг өргөлтөөр хичээллэхдээ маш олон бэртэл гэмтэл авсан, 100 хувь эрүүл, бэртэж үзээгүй нэг ч үе байхгүй, сүүлийн 2 жилийн турш асар хүчтэй эм тариа антибиотикийг өвдөлтөө намдаахын тулд байнга хийж ирснээ дурдсан юм. Эрүүл мэндээ анхаарах цаг болсон гэж хэлсэн М.Анхцэцэг спортоосоо бүр хөндийрөхгүй гэв.
Дэлхийн аварга шалгаруулах тэмцээнд сая явахдаа л М.Анхцэцэг хэдийнэ зодог тайлах шийдвэрээ гаргасан байсан тухайгаа ярьсан бөгөөд тэмцээний заалнаас явмааргүй санагдаж, зүүгдэх мэдрэмж төрсөн талаараа ч дурдсан байна.
М.Анхцэцэг гаргасан амжилт, явсан зам мөртөө 100 хувь сэтгэл хангалуун байгаа, 17 жилийн турш өөрийнхөө хувьд харамсахааргүй сайхан үзлээ гэсэн юм.
Ард түмний хайртай “Алтан охин” М.Анхцэцэгтээ эрүүл энх, аз жаргалыг хүсье. Мөрөөдөл бүхэн нь биелж яваг ээ.
Сэтгэгдэл (0)
Сэтгэгдэл бичигдээгүй байна